کمالیہ میں ہیڈسدھنائی کو  بچانےکیلئےدریائے راوی پر مائی صفوراں بند کو  توڑدیاگیا

پنجاب کے شہر کمالیہ میں ہیڈسدھنائی کو  بچانےکیلئےدریائے راوی پر مائی صفوراں بند کو  بارودی مواد سے توڑدیاگیا۔

ہیڈ سدھنائی کے مقام پر انتہائی اونچے درجے کا سیلاب ہے ، 12 ہزار کیوسک اضافے کے بعد یہاں پانی کا بہاؤ ایک لاکھ85 ہزار 563  کیوسک ریکارڈ کیا گیا جس کے باعث مزید کئی دیہات زیر آب اور  ہزاروں ایکڑ  پر کاشت فصلیں دریا بُرد ہوگئیں۔

ڈپٹی کمشنر کمالیہ چودھری نعیم سندھو  کا کہنا ہے کہ ہیڈ سدھنائی کو بچانے کیلئے دریائے راوی کا حفاظتی بند توڑا گیا ہے۔

بندتوڑنےسے تحصیل پیر محل کے 12 دیہات ڈوب گئے، بند توڑنے سے قبل علاقہ مکینوں کو اپنے مال مویشی سمیت محفوظ مقامات پرمنتقل کردیا گیا تھا، ہیڈ سدھنائی کے سیلابی ریلے سے ضلع خانیوال کے 136 مواضعات متاثر  ہوئے ہیں۔

دریائے راوی میں ہیڈ جسڑ پر بھی پانی کی آمد میں اضافہ ہوا ہے جہاں 63 ہزار 720کیوسک کے ساتھ نچلے درجے کا سیلاب ہے ۔

ادھر ڈی جی پی ڈی ایم اے عرفان علی کاٹھیا نے پریس کانفرنس میں بتایا کہ انڈین ہائی کمیشن کی جانب سے الرٹ جاری کیا گیا ہے کہ دریائے توی میں اونچے درجے کا سیلاب آسکتا ہے، ہیڈ مرالہ پر ایک گھنٹے میں 60 ہزار کیوسک پانی بڑھ چکا ہے۔

یاد رہے کہ نیشنل ڈیزاسٹر مینجمنٹ اتھارٹی (این ڈی ایم اے) نے ملک میں بارشوں اور سیلاب سے اب تک ہونے والے جانی اور مالی نقصانات کا ڈیٹا جاری کر دیا ہے۔

این ڈی ایم اے کے مطابق ملک بھر میں بارشوں اور سیلاب کے باعث اب تک 881 افراد جاں بحق اور 1176 زخمی ہوئے جن میں سے پنجاب میں 223 افراد جاں بحق اور 648 زخمی ہوئے۔