سوشل میڈیا پر ٹرینڈز کو فالو کرتے ہوئےکچے نوڈلز کھانے والا لڑکا جان سے ہاتھ دھو بیٹھا

قاہرہ:  مصر میں سوشل میڈیا ٹرینڈ کی نقالی جان لیوا ثابت ہوئی، دارالحکومت قاہرہ سے تعلق رکھنے والا 13 سالہ لڑکا کچے نوڈلز کھانے کے باعث جاں بحق ہوگیا۔

غیر ملکی میڈیا کے مطابق یہ واقعہ گزشتہ ماہ کی 23 تاریخ کو پیش آیا، جب نوعمر لڑکے نے سوشل میڈیا پر وائرل ہونے والے چیلنج کے تحت ایک ہی وقت میں 3 پیکٹ کچے نوڈلز کھا لیے۔

رپورٹس میں بتایا گیا ہے کہ کھانے کے کچھ ہی دیر بعد لڑکے کو پیٹ میں شدید درد، الٹی اور کپکپی کی شکایت ہوئی۔ طبیعت بگڑنے پر اسے اسپتال منتقل کیا گیا تاہم وہ جانبر نہ ہو سکا۔

ماہرین صحت کا کہنا ہے کہ زیادہ مقدار میں کچا یا نیم پکا کھانا کھانے سے نظامِ انہضام پر شدید دباؤ پڑ سکتا ہے جو بعض اوقات مہلک ثابت ہوتا ہے۔