وزیر اعظم شہباز شریف اکتوبر کے دوسرے ہفتے جاپان کے سرکاری دورہ پر روانہ ہونگے

اسلام آباد:وزیرِاعظم شہباز شریف اکتوبر کے دوسرے ہفتے میں جاپان کا دورہ کریں گے۔

 سفارتی ذرائع کے مطابق وزیراعظم پاکستان 7 سے 9 اکتوبر تک جاپان کا دورہ کریں گے،یہ کسی بھی پاکستانی وزیرِ اعظم کا 20 سال بعد جاپان کا دورہ ہو گا۔

ذرائع کے مطابق، اس دورے کے دوران جاپان کی جانب سے پاکستان کے لیے بڑے معاشی و تجارتی پیکج کا اعلان متوقع ہے، جس میں سرمایہ کاری، صنعتی ترقی، ٹیکنالوجی کے تبادلے اور برآمدات کے فروغ سے متعلق متعدد منصوبے شامل ہوں گے۔ اس کے علاوہ، کئی اہم معاہدوں اور مفاہمتی یادداشتوں پر دستخط کیے جانے کی توقع ہے، جو دونوں ممالک کے تعلقات میں سنگِ میل ثابت ہوں گے۔

 وزیراعظم شہباز شریف جاپانی وزیراعظم اور دیگر اعلیٰ قیادت سے ملاقات کریں گے، جن میں حکومت، کاروبار، تعلیم اور عوامی شعبوں میں تعاون بڑھانے پر گفتگو کی جائے گی۔

جاپان سے قبل وزیراعظم شہباز شریف ملائیشیا کا دورہ بھی کر رہے ہیں،سفارتی ذرائع کاکہنا ہے کہ ان کا دورہ ملائیشیا 5 سے 7 ستمبر تک جاری رہے گا۔

ذرائع کے مطابق آنے والے ہفتوں میں ملائیشیا کی مسلح افواج اور ملائیشیا کی بحریہ کے سربراہان کے دورہ پاکستان بھی متوقع ہیں۔ذرائع کا مزید کہنا ہے کہ ترکیہ کا ایک اعلی سطح وفد بھی آئندہ ہفتے پاکستان پہنچے گا۔