پی ٹی اے اور NCCIA کی مشترکہ کارروائی، آئی ایم ای آئی ٹمپرنگ اور کلون موبائلز کے خلاف کریک ڈاؤن

پاکستان ٹیلی کمیونیکیشن اتھارٹی (پی ٹی اے) کے زونل دفتر ایبٹ آباد نے نیشنل سائبر کرائم انویسٹی گیشن ایجنسی (NCCIA) ایبٹ آباد کے ساتھ مل کر موبائل فونز کی غیر قانونی آئی ایم ای آئی ٹمپرنگ اور کلون/پیچڈ ڈیوائسز کی فروخت کے خلاف ہری پور میں مختلف مقامات پر مشترکہ چھاپے مارے۔

یہ کارروائیاں فوارہ مسجد موچی بازار اور مین جی ٹی روڈ پر واقع موبائل مرمت کی دکانوں پر کی گئیں، جن کے دوران موبائل فونز، ڈیسک ٹاپ کمپیوٹرز، لیپ ٹاپس، یو ایس بی ڈیوائسز اور ڈی وی آرز قبضے میں لے لیے گئے۔

موقع پر تین افراد کو گرفتار کرکے مزید قانونی کارروائی کے لیے NCCIA کے حوالے کر دیا گیا۔ پی ٹی اے نے واضح کیا ہے کہ آئی ایم ای آئی ٹمپرنگ اور کلون موبائلز کی خرید و فروخت نہ صرف غیر قانونی ہے بلکہ قومی سلامتی اور عوامی تحفظ کے لیے بھی خطرہ بن چکی ہے۔

اتھارٹی نے عوام سے اپیل کی ہے کہ وہ مشکوک سرگرمیوں کی فوری اطلاع دیں تاکہ ڈیجیٹل ایکو سسٹم کے تحفظ اور محفوظ کمیونیکیشن سروسز کو یقینی بنایا جا سکے۔ پی ٹی اے اور NCCIA اس مقصد کے لیے اپنی مشترکہ کوششیں جاری رکھنے کے عزم پر قائم ہیں۔