نئی فائزر کووڈ 19ویکسین سے مدافعتی صلاحیت میں 4 گنا اضافہ، ابتدائی کلینیکل ٹرائل میں کامیابی

ویب ڈیسک:  فائزر اور اس کی جرمن شراکت دار دوا ساز کمپنی بائیو این ٹیک نے دعویٰ کیا ہے کہ ان کی نئی اپ ڈیٹ شدہ کووڈ-19 ویکسین نے بزرگ افراد اور خطرے سے دوچار بالغ مریضوں میں مضبوط مدافعتی ردِعمل ظاہر کیا ہے،جبکہ ابتدائی کلینکل ٹرائل کے دوران بھی اس کے حوصلہ افزا نتائج برآمد ہوئے ہیں۔

غیر ملکی میڈیا کے کمپنی کا کہنا ہے کہ ایک جاری حتمی مرحلے کے کلینیکل ٹرائل کے ابتدائی نتائج سے معلوم ہوا ہے کہ ویکسین لگوانے کے بعد شرکاء میں LP.8.1 نامی وائرس کے خلاف بننے والی نیوٹرلائزنگ اینٹی باڈیز کی سطح میں کم از کم چار گنا اضافہ دیکھا گیا۔

کمپنی کے مطابق یہ ٹرائل 100 بالغ افراد پر مشتمل تھا، جن میں 65 سال یا اس سے زائد عمر کے افراد شامل تھے، نیز 18 سے 64 سال کی عمر کے وہ افراد جنہیں کوئی نہ کوئی بنیادی بیماری لاحق ہے۔

دوا ساز کمپنی  کا مزید  کہنا ہے کہ اس تحقیق کا مقصد ویکسین کے مدافعتی اثرات کے بارے میں اضافی معلومات فراہم کرنا ہے، اور یہ امریکی ادارۂ صحت کی طرف سے مقرر کردہ بعد از مارکیٹ معیارات کی جگہ نہیں لے گی۔

خیال رہے کہ یہ پیش رفت ایسے وقت میں سامنے آئی ہے جب ماہرین وائرس کی نئی اقسام کے خلاف ویکسینز کی افادیت پر زور دے رہے ہیں، تاکہ خاص طور پر خطرے سے دوچار افراد کو بہتر تحفظ فراہم کیا جا سکے۔