اسرائیل کے خلاف جنگ جیتنے پر ایرانی بھائیوں کو گلے لگا کر مبارکباد دیتے ہیں، نواز شریف

مسلم لیگ (ن) کے صدر اور سابق وزیراعظم نواز شریف نے کہا ہے کہ ایران کی اسرائیل کے خلاف جنگ میں فتح پر ہم ایرانی بھائیوں کو گلے لگا کر مبارکباد پیش کرتے ہیں۔ ان کا کہنا تھا کہ جنگ کے دوران پاکستانی عوام کی دعائیں اور ہمدردیاں ایران کے ساتھ تھیں۔

یہ بات انہوں نے لاہور میں ایرانی سفیر کے ساتھ ہونے والی ملاقات کے دوران کہی، جس میں وزیراعلیٰ پنجاب مریم نواز بھی شریک تھیں۔ ملاقات میں دوطرفہ تعلقات، خطے کی صورتحال، توانائی اور تجارت کے فروغ سمیت مختلف امور پر گفتگو ہوئی۔ شرکاء نے پاک ایران تعلقات کو نئی بلندیوں تک لے جانے پر اتفاق کیا۔

نواز شریف نے کہا “ایرانی صدر کی پاکستان آمد کے موقع پر لاہور میں ان کا خیرمقدم کرنا خوشگوار تجربہ تھا۔ ایران کے ساتھ تعلقات کو بہتری کی اعلیٰ ترین سطح تک لے جانا چاہتے ہیں۔ ایران کے رہبرِ اعلیٰ کی شخصیت متاثر کن ہے۔”

انہوں نے مزید کہا کہ “پاکستان کے معاشی حالات اللہ تعالیٰ کے فضل سے بہتری کی جانب گامزن ہیں۔ بدقسمتی سے سابقہ ادوار میں ہمسایہ ممالک کے ساتھ تعلقات خراب ہوئے، لیکن اب ہم خطے میں بہتر تعلقات کے خواہاں ہیں۔”

اس موقع پر وزیراعلیٰ پنجاب مریم نواز نے کہا “ایرانی صدر کے دورۂ پاکستان نے دو طرفہ شراکت داری کو مزید فروغ دیا ہے۔ ایرانی حکومت اور عوام کی ہمدردی اور یکجہتی ہمارے دیرینہ تعلقات کی عکاسی کرتی ہے۔”

انہوں نے کہا کہ پنجاب میں سیلاب سے متاثرہ علاقوں میں بحالی کا کام جاری ہے اور بروقت اقدامات سے ہزاروں قیمتی جانیں بچائی گئیں۔

مریم نواز نے ایرانی قوم کو خراج تحسین پیش کرتے ہوئے کہا “ایران نے بڑی بہادری سے جنگ لڑی۔ نواز شریف ہمیشہ ایران کے لیے دعاؤں کی تلقین کرتے رہے۔ تعلیم کے دوران فارسی زبان بطور مضمون پڑھی تھی۔”

ایرانی سفیر نے اس موقع پر کہا “ایران اور پاکستان کے درمیان تعلقات نہایت متاثر کن ہیں۔ ایرانی حکومت اور عوام، پاکستان کی قیادت اور عوام کی بھرپور حمایت پر شکر گزار ہیں۔ دونوں ممالک کے مابین اقتصادی، تجارتی اور ثقافتی تعلقات روز بروز مضبوط ہو رہے ہیں۔”