چارلی کرک کے قتل میں ملوث مشتبہ شخص گرفتار، ٹرمپ کا دعویٰ

واشنگٹن: سابق امریکی صدر ڈونلڈ ٹرمپ نے انکشاف کیا ہے کہ ان کے قریبی ساتھی چارلی کرک کے قتل کے الزام میں ایک مشتبہ شخص کو حراست میں لے لیا گیا ہے۔

غیر ملکی خبر رساں ایجنسی اے ایف پی کے مطابق ٹرمپ نے فاکس نیوز کو دیے گئے ایک لائیو اسٹوڈیو انٹرویو میں کہا کہ "بڑے پیمانے پر تلاشی کے بعد ایک مشتبہ شخص کو گرفتار کیا گیا ہے، اور ایسا لگتا ہے کہ ہمارے پاس وہی شخص ہے۔" انہوں نے مزید بتایا کہ "ایک فرد جس نے مشتبہ شخص کو پہچانا، اُس نے اس کی گرفتاری میں مدد کی۔"

ٹرمپ نے مشتبہ شخص کی شناخت ظاہر نہیں کی۔

یاد رہے کہ ایک روز قبل امریکی حکام نے کہا تھا کہ چارلی کرک کے قتل میں ممکنہ طور پر استعمال ہونے والی بولٹ ایکشن رائفل برآمد کرلی گئی ہے، اور قاتل کے بارے میں معلومات فراہم کرنے پر ایک لاکھ ڈالر انعام کا اعلان بھی کیا گیا تھا۔

خبر رساں ایجنسی رائٹرز کی رپورٹ کے مطابق تحقیقاتی اداروں نے مشتبہ شخص کی تصاویر بھی جاری کی تھیں، جن میں وہ ایک کالج طالب علم عمر کا دکھائی دیتا ہے۔

واضح رہے کہ 11 ستمبر کو 31 سالہ چارلی کرک، جو قدامت پسند تنظیم ٹرننگ پوائنٹ یو ایس اے کے سی ای او اور شریک بانی تھے، یوٹاہ ویلی یونیورسٹی میں ایک تقریب کے دوران فائرنگ کا نشانہ بنے تھے اور موقع پر ہی ہلاک ہو گئے تھے۔

سابق صدر ڈونلڈ ٹرمپ نے ان کی موت کا اعلان اپنی سوشل میڈیا ویب سائٹ ٹروتھ سوشل پر کرتے ہوئے لکھا:

"عظیم، بلکہ حقیقی معنوں میں ایک لیجنڈری، چارلی کرک وفات پا گئے ہیں۔"