توشہ خانہ ٹو کیس: عمران خان اور بشریٰ بی بی کا ٹرائل روکنے کے لیے اسلام آباد ہائیکورٹ سے رجوع

اسلام آباد: پاکستان تحریک انصاف (پی ٹی آئی) کے بانی عمران خان اور ان کی اہلیہ بشریٰ بی بی نے توشہ خانہ ٹو کیس میں ٹرائل روکنے کے لیے اسلام آباد ہائیکورٹ سے رجوع کر لیا ہے۔

درخواست بیرسٹر سلمان صفدر اور ایڈوکیٹ خالد یوسف چوہدری کے ذریعے اسلام آباد ہائیکورٹ میں جمع کرائی گئی، جس میں ٹرائل کورٹ کی جانب سے نومبر 2024 میں بریت کی درخواستیں مسترد کیے جانے کے فیصلے کو چیلنج کیا گیا ہے۔

درخواست گزاروں نے مؤقف اختیار کیا ہے کہ مسترد شدہ بریت درخواستوں کے خلاف 21 جنوری 2025 کو اپیل دائر کی گئی، جس پر آخری سماعت 25 اپریل کو ہوئی، تاہم اس کے بعد سے اپیل کو دوبارہ سماعت کے لیے مقرر نہیں کیا گیا۔

درخواست میں مؤقف اختیار کیا گیا ہے کہ اپیل کی سماعت میں تاخیر سے درخواست گزاروں کے قانونی حقوق متاثر ہونے کا خدشہ ہے، لہٰذا عدالت سے استدعا ہے کہ اپیل کو جلد سماعت کے لیے مقرر کیا جائے .