برطانیہ پاکستان کے سیلاب زدگان کے لیے 30 لاکھ پاؤنڈ کی ہنگامی امداد دے گا

اسلام آباد: برطانیہ پاکستان کے سیلاب متاثرین کے لیے 30 لاکھ پاؤنڈ کی ہنگامی امداد فراہم کرے گا۔

 رپورٹ کے مطابق برطانیہ کی ہائی کمشنر جین میریٹ نے نائب وزیراعظم و وزیر خارجہ سینیٹر محمد اسحٰق ڈار سے اسلام آباد میں ملاقات کی، جس میں سیلاب اور مون سون کی تباہ کاریوں سے نمٹنے کے لیے کیے جانے والے اقدامات پر تفصیلی گفتگو ہوئی۔

اس موقع پر برطانوی ہائی کمشنر نے پاکستان کے ساتھ مکمل یکجہتی کا اظہار کرتے ہوئے کہا کہ برطانیہ 30 لاکھ پاؤنڈ کی ہنگامی امداد فراہم کر رہا ہے۔

نائب وزیراعظم محمد اسحاق ڈار نے برطانیہ کے اس فوری تعاون کو سراہتے ہوئے مشکل وقت میں پاکستان کے ساتھ یکجہتی پر شکریہ ادا کیا۔

ملاقات کے دوران دونوں فریقین نے دوطرفہ تعلقات، اعلیٰ سطح کے رابطوں کی اہمیت اور علاقائی و عالمی امور پر بھی تبادلہ خیال کیا۔