غزہ م: اسرائیلی بمباری سے مزید 59 فلسطینی شہید، مجموعی شہادتیں 64 ہزار 700 سے تجاوز

غزہ: اسرائیلی فوج کے تازہ فضائی حملوں میں آج مزید 59 فلسطینی شہید ہو گئے، جس کے بعد گزشتہ کئی ماہ سے جاری جارحیت کے دوران شہادتوں کی مجموعی تعداد 64,756 تک جا پہنچی ہے۔

قطری نشریاتی ادارے الجزیرہ کی رپورٹ کے مطابق غزہ کی وزارت صحت کا کہنا ہے کہ صرف آج کی بمباری میں 42 افراد غزہ شہر اور شمالی غزہ پٹی میں شہید ہوئے۔ وزارت نے بتایا کہ پچھلے 24 گھنٹوں میں 59 افراد شہید اور 200 سے زائد زخمی ہوئے۔

اب تک جاری اسرائیلی حملوں میں زخمیوں کی تعداد 164,059 تک پہنچ چکی ہے۔

جبری انخلا کے باوجود غزہ میں 13 لاکھ سے زائد فلسطینی موجود

غزہ کے سرکاری میڈیا آفس کے مطابق، اسرائیلی بمباری، جبری انخلا کی دھمکیوں اور سخت ترین حالات کے باوجود 13 لاکھ سے زائد فلسطینی اب بھی غزہ سٹی اور شمالی علاقوں میں موجود ہیں، جن میں 3 لاکھ 50 ہزار بچے بھی شامل ہیں۔

دفتر نے انکشاف کیا کہ اسرائیلی حکام نے خبردار کیا ہے کہ جو شہری اس بار شمالی غزہ چھوڑیں گے، انہیں واپس آنے کی اجازت نہیں دی جائے گی۔ انسانی حقوق کی تنظیموں نے اس عمل کو بین الاقوامی قوانین کے تحت جنگی جرم اور جبری نقل مکانی قرار دیا ہے۔

خان یونس اور رفح میں "محفوظ علاقوں" پر بھی حملے

سرکاری میڈیا آفس کا کہنا ہے کہ خان یونس اور رفح، جنہیں اسرائیلی افواج نے ’محفوظ انسانی علاقے‘ قرار دے کر 8 لاکھ سے زائد فلسطینیوں کو وہاں منتقل ہونے پر مجبور کیا، وہاں بھی 100 سے زائد مرتبہ بمباری کی جا چکی ہے۔

ان حملوں میں 2,000 سے زائد افراد شہید ہوئے ہیں۔

دفتر کا مزید کہنا تھا کہ ان علاقوں میں بنیادی سہولیات، جیسے پانی، بجلی، طبی سہولتیں اور انفرا اسٹرکچر نہ ہونے کے برابر ہیں۔ الزام عائد کیا گیا کہ اسرائیلی افواج نے جان بوجھ کر خان یونس میں پانی کی لائنیں کاٹ دی ہیں تاکہ زندگی کو تقریباً ناممکن بنا دیا جائے۔