پاکستان کی قطر پر اسرائیلی حملے کی شدید مذمت

اسلام آباد: پاکستان نے قطر پر اسرائیلی حملے کو ایک برادر اسلامی ملک کی خودمختاری اور سلامتی کے خلاف سنگین خلاف ورزی قرار دیتے ہوئے اس کی شدید مذمت کی ہے۔ دفتر خارجہ کے ترجمان شفقت علی خان نے ہفتہ وار بریفنگ میں کہا کہ دنیا کو اسرائیل کے اس اقدام کا احتساب کرنا چاہیے۔

ترجمان دفتر خارجہ نے بتایا کہ وزیر اعظم شہباز شریف نے قطر سے اظہارِ یکجہتی کے لیے خصوصی دورہ کیا اور قطر کی قیادت کو پاکستان کی طرف سے سخت مذمت کا پیغام پہنچایا۔ انہوں نے کہا"پاکستان مشکل کی اس گھڑی میں قطر کے ساتھ کھڑا ہے، اسرائیلی حملے نہ صرف بین الاقوامی قوانین بلکہ اقوامِ متحدہ کے چارٹر کی بھی کھلی خلاف ورزی ہیں۔"

ترجمان نے کہا کہ غزہ میں قیامِ امن کے لیے قطر کے کردار کو سراہتے ہوئے، وزیر اعظم نے قطر کے زیرِ اہتمام عرب-اسلامی سمٹ کو بھی ایک اہم پیش رفت قرار دیا۔

اقوام متحدہ کا ہنگامی اجلاس اور اسرائیلی جارحیت

ترجمان نے مزید بتایا کہ پاکستان، الجزائر اور صومالیہ کی مشترکہ درخواست پر اقوامِ متحدہ نے ہنگامی اجلاس طلب کر لیا ہے تاکہ قطر پر حملے اور جاری اسرائیلی جارحیت پر غور کیا جا سکے۔

واضح رہے کہ 9 ستمبر کو اسرائیل نے قطر میں فضائی حملہ کرتے ہوئے حماس کے رہنما خلیل الحیہ کو نشانہ بنانے کا دعویٰ کیا تھا۔ حملے میں خلیل الحیہ تو محفوظ رہے، تاہم ان کے بیٹے اور معاون سمیت 6 افراد شہید ہو گئے تھے۔