بلاول بھٹو زرداری کا سیلاب متاثرین کی امداد کے لیے عالمی اپیل کا مطالبہ

اسلام آباد: پاکستان پیپلز پارٹی کے چیئرمین بلاول بھٹو زرداری نے وفاقی حکومت سے مطالبہ کیا ہے کہ حالیہ سیلاب متاثرین کی امداد کے لیے فوری طور پر عالمی اداروں سے مدد کی اپیل کی جائے، تاکہ کروڑوں متاثرہ پاکستانیوں کو ریلیف فراہم کیا جا سکے۔

سماجی رابطے کی ویب سائٹ "ایکس" (سابقہ ٹوئٹر) پر جاری پیغام میں بلاول بھٹو نے کہا کہ بین الاقوامی امداد کی اپیل نہ کرکے متاثرہ عوام کو امداد سے محروم رکھنا کسی صورت درست نہیں۔ انہوں نے کہا کہ یہ اقدام فوری طور پر اٹھایا جانا چاہیے۔

بلاول بھٹو نے وفاقی حکومت کی جانب سے ماحولیاتی اور زرعی ایمرجنسی کے اعلان کو خوش آئند قرار دیا، تاہم افسوس کا اظہار کیا کہ گلگت بلتستان، خیبر پختونخوا، پنجاب، اور خاص طور پر جنوبی پنجاب کے سیلاب متاثرہ علاقوں میں بینظیر انکم سپورٹ پروگرام (BISP) کے تحت اب تک کوئی ریلیف فراہم نہیں کیا گیا۔

انہوں نے مزید کہا کہ اقوامِ متحدہ کے نظام کے تحت بین الاقوامی امداد کی اپیل میں تاخیر ناقابلِ فہم ہے۔ 2022 کے سیلاب کے دوران، جب وہ وزیر خارجہ تھے، ایسی ہی اپیل کی گئی تھی، جس کے مثبت نتائج سامنے آئے۔

پی پی چیئرمین نے کہا کہ پاکستان ماضی میں 2005 کے زلزلے اور 2010 کے سیلاب کے دوران بھی عالمی برادری سے مدد مانگ چکا ہے، اور یہ ایک عالمی روایت ہے کہ قدرتی آفات کے ابتدائی 72 گھنٹوں میں عالمی امداد کی اپیل کی جاتی ہے۔

بلاول بھٹو نے اعلان کیا کہ پاکستان پیپلز پارٹی سیلاب متاثرین کے حق میں تمام صوبائی اسمبلیوں، قومی اسمبلی اور سینیٹ میں قراردادیں پیش کرے گی۔

انہوں نے زور دیا کہ سیلاب سے سب سے زیادہ نقصان زرعی شعبے کو پہنچا ہے، اور اُمید ظاہر کی کہ وفاقی حکومت اس کی بحالی کے لیے پیپلز پارٹی کے اقدامات میں بھرپور تعاون کرے گی۔