سپریم کورٹ لاہور رجسٹری: غیر ملکی قیدیوں کی رہائی اور وطن واپسی کا فیصلہ

سپریم کورٹ لاہور رجسٹری کے نظرثانی بورڈ نے وہ غیر ملکی قیدی جو اپنی سزا پوری کر چکے ہیں، ان کی رہائی کا حکم جاری کرتے ہوئے انہیں ان کے وطن واپس بھیجنے کی ہدایت کی ہے۔

عدالت میں 29 مرد اور 4 خواتین غیر ملکی قیدیوں کو پیش کیا گیا، جن پر غیر قانونی طور پر سرحد عبور کرنے اور اسمگلنگ جیسے الزامات عائد تھے۔

یہ قیدی بھارت، بنگلہ دیش، کینیا، افریقی ممالک سمیت مختلف ریاستوں سے تعلق رکھتے ہیں۔

سماعت کے دوران ایڈیشنل ہوم سیکرٹری جیل، ڈپٹی سپرنٹنڈنٹ اور دیگر متعلقہ افسران عدالت میں موجود تھے۔

عدالت نے واضح طور پر ہدایت کی کہ جن قیدیوں نے اپنی سزا پوری کر لی ہے، انہیں مزید حراست میں نہ رکھا جائے، اور جلد از جلد متعلقہ ممالک کو واپس بھیجا جائے۔

اس کے علاوہ نظرثانی بورڈ نے جیل انتظامیہ کو قید کے دوران غیر ملکی قیدیوں کو معیاری خوراک اور بہتر طبی سہولیات فراہم کرنے کا بھی حکم دیا۔