ایشیا کپ: پاک-بھارت مقابلے کے دوران بی سی سی آئی حکام کا دبئی نہ جانے کا فیصلہ

ایشیا کپ کے میزبان ہونے کے باوجود، بھارتی کرکٹ بورڈ (بی سی سی آئی) کے سینئر حکام پاک بھارت میچ کے موقع پر دبئی میں موجود نہیں ہوں گے۔

بھارتی میڈیا رپورٹس کے مطابق، پاکستان کے خلاف میچ کو لے کر جاری بائیکاٹ مہم کے تناظر میں بی سی سی آئی نے یہ پالیسی اختیار کی ہے کہ کسی بھی اعلیٰ عہدے دار کو دبئی نہ بھیجا جائے۔ زیادہ تر حکام نے میچ سے دوری اختیار کی ہے، اور میڈیا نے اس اقدام کو "خاموش بائیکاٹ" کا نام دیا ہے۔

ذرائع کے مطابق، پچھلی چیمپئنز ٹرافی میں بھارتی بورڈ کے کئی اعلیٰ نمائندے اور ریاستی ایسوسی ایشنز کے اراکین بڑی تعداد میں شریک تھے۔ تاہم، اس بار آئی سی سی چیئرمین جے شاہ امریکا میں ایک اجلاس میں مصروف ہیں۔ بی سی سی آئی کے سیکرٹری دیوجیت سائیکیا نے ویمنز ورلڈ کپ کی تیاریوں کا جواز پیش کرتے ہوئے دبئی جانے سے معذرت کی، جبکہ آئی پی ایل کے چیئرمین ارون دھمال نے بھی اسٹیڈیم جانے سے گریز کیا ہے۔

میڈیا رپورٹس کا کہنا ہے کہ بی سی سی آئی کے نائب صدر اور اے سی سی کے ایگزیکٹو بورڈ کے رکن راجیو شکلا صرف بھارت کی فتح کی صورت میں منظر عام پر آ سکتے ہیں۔ دیگر حکام کی شرکت بھی ممکنہ کامیابی سے مشروط قرار دی جا رہی ہے۔