دہشت گردی پر دوٹوک موقف: افغانستان خارجیوں یا پاکستان میں سے انتخاب کرے، وزیراعظم

وزیراعظم شہباز شریف نے کہا ہے کہ دہشت گردی کے خلاف کارروائیاں پوری شدت کے ساتھ جاری رہیں گی اور اس معاملے میں کسی قسم کا ابہام برداشت نہیں کیا جائے گا۔ ان کا کہنا تھا کہ افغانستان کو واضح پیغام دے دیا گیا ہے کہ اب وقت آ گیا ہے کہ وہ خارجی عناصر اور پاکستان میں سے کسی ایک کا انتخاب کرے۔

وزیراعظم شہباز شریف اور چیف آف آرمی اسٹاف جنرل سید عاصم منیر نے بنوں کا دورہ کیا، جہاں دہشت گردی سے متعلق ایک اعلیٰ سطحی اجلاس میں شرکت کی۔ اجلاس میں سیکیورٹی صورتحال اور حالیہ دہشت گرد حملوں پر تفصیلی بریفنگ دی گئی۔

سیکیورٹی ذرائع کے مطابق، وزیراعظم اور آرمی چیف نے جنوبی وزیرستان آپریشن میں شہید ہونے والے 12 جوانوں کی نماز جنازہ میں شرکت کی اور بنوں سی ایم ایچ میں زخمی اہلکاروں کی عیادت بھی کی۔

ذرائع کے مطابق، کور کمانڈر پشاور نے اجلاس میں بتایا کہ دہشت گردوں کے سرغنہ اور سہولت کار افغانستان میں موجود ہیں، جنہیں بھارت کی مکمل حمایت حاصل ہے۔ حالیہ آپریشنز کے دوران فورسز نے "فتنہ الہند" کے 35 دہشت گردوں کو ہلاک کیا، جبکہ 12 جوان وطن پر قربان ہوئے۔

اس موقع پر وزیراعظم نے واضح کیا کہ دہشت گردی کے معاملے پر پوری قوم متحد ہے، اور بھارتی پراکسیوں یا ان کے سہولت کاروں سے سختی سے نمٹا جائے گا۔

ان کا کہنا تھا کہ جو عناصر خارجی ایجنڈے کو فروغ دیتے ہیں اور ان کے لیے نرمی کی بات کرتے ہیں، وہ دراصل ان کے آلہ کار ہیں اور انہیں بھی اسی زبان میں جواب دیا جائے گا جس کے وہ مستحق ہیں۔

وزیراعظم نے متعلقہ اداروں کو ہدایت کی کہ دہشت گردی کے خلاف مؤثر اور فوری اقدامات کے لیے تمام ضروری انتظامی و قانونی اقدامات فی الفور کیے جائیں۔

انہوں نے مزید کہا کہ حالیہ حملوں میں افغان شہریوں کے ملوث ہونے کے شواہد موجود ہیں، اور یہ بھی واضح کیا کہ پاکستان میں غیر قانونی طور پر مقیم افغان باشندوں کا جلد انخلا ناگزیر ہو چکا ہے۔