دیر لال قلعہ میں خوارج کے خلاف آپریشن، 7 جوان شہید، 10 دہشتگرد ہلاک

صوبہ خیبر پختونخوا کے ضلع دیر کے علاقے لال قلعہ میں سیکیورٹی فورسز نے دہشتگردوں کے ایک خفیہ ٹھکانے پر کارروائی کرتے ہوئے 10 بھارتی سرپرست خوارج کو ہلاک کر دیا، جبکہ 7 بہادر جوان وطن پر قربان ہو گئے۔

آئی ایس پی آر کے مطابق یہ آپریشن بھارتی پراکسی تنظیم "فتنہ الخوارج" کے خلاف خفیہ اطلاع پر کیا گیا۔ کارروائی کے دوران شدید فائرنگ کا تبادلہ ہوا، جس میں فورسز نے خوارج کے زیرِ قبضہ معصوم شہریوں کو بازیاب کرایا۔

آپریشن میں شہید ہونے والے جوانوں میں نائیک عبدالجلیل ،نائیک گل جان ، لانس نائیک عظمت اللہ ، سپاہی عبدالمالک ، سپاہی محمد امجد ، سپاہی محمد داؤد ، سپاہی فضل قیوم ، شامل ہیں، جنہوں نے جانوں کا نذرانہ دے کر کئی شہریوں کی زندگیاں بچائیں۔

آئی ایس پی آر کا کہنا ہے کہ خفیہ اطلاعات کے مطابق اس حملے میں افغان شہریوں کی براہ راست مداخلت کے شواہد موجود ہیں۔ پاکستان نے افغان عبوری حکومت سے مطالبہ کیا ہے کہ وہ اپنی سرزمین کو دہشتگردی کے لیے استعمال نہ ہونے دے۔

مزید کہا گیا کہ علاقے میں کلیئرنس آپریشن جاری ہے تاکہ بھارتی حمایت یافتہ خوارج کے باقی عناصر کا خاتمہ کیا جا سکے۔

یاد رہے، اس سے قبل بھی خیبر پختونخوا میں کیے گئے سیکیورٹی آپریشنز میں 35 دہشتگرد ہلاک اور 12 سیکیورٹی اہلکار شہید ہو چکے ہیں۔ پاک فوج نے عزم دہرایا ہے کہ دہشتگردی کے اس ناسور کو جڑ سے اکھاڑ پھینکا جائے گا۔