وزیراعظم کا سیلاب متاثرہ علاقوں کے لیے ریلیف، اگست کے بجلی بل مؤخر

اسلام آباد: وزیراعظم شہباز شریف نے سیلاب سے متاثرہ علاقوں میں اگست کے بجلی بلوں کی وصولی روکنے کا حکم دے دیا۔

یہ فیصلہ وزیراعظم کی زیر صدارت سیلاب متاثرہ علاقوں میں بجلی بلوں کے حوالے سے اجلاس کے دوران کیا گیا، جس میں بجلی تقسیم کار کمپنیوں کو ہدایت جاری کی گئی کہ ان علاقوں سے فی الحال اگست کے بجلی بل وصول نہ کیے جائیں۔

وزیراعظم نے کہا کہ جن صارفین سے اگست کا بل پہلے ہی وصول کیا جا چکا ہے، ان کی رقم آئندہ ماہ کے بل میں ایڈجسٹ کی جائے گی۔

ان کا کہنا تھا کہ متاثرہ علاقوں کے لیے بجلی بل معافی یا رعایت سے متعلق حتمی پیکیج آئی ایم ایف سے معاملات طے ہونے کے بعد پیش کیا جائے گا۔

وزیراعظم نے کہا "سیلاب نے پورے پاکستان میں لاکھوں افراد کو متاثر کیا ہے، جب تک متاثرہ خاندان اپنے گھروں کو واپس نہیں لوٹتے، حکومت چین سے نہیں بیٹھے گی۔"

انہوں نے وفاقی اور صوبائی اداروں کو ہدایت کی کہ متاثرین کی مکمل بحالی تک امدادی سرگرمیوں کو تیز رکھا جائے۔