قادرپور گیس فیلڈ کے 10 کنوؤں سے گیس کی سپلائی بند، ہزاروں افراد نقل مکانی پر مجبور

سندھ میں سیلابی صورتحال کے باعث قادرپور گیس فیلڈ کے 10 کنوے متاثر ہو گئے، جس کے باعث ان کنوؤں سے گیس کی فراہمی معطل کر دی گئی ہے۔

ضلع گھوٹکی میں شدید سیلابی پانی نے گیس فیلڈ کے بنیادی ڈھانچے کو نقصان پہنچایا، جبکہ لاڑکانہ میں زمینداری بند میں 100 فٹ چوڑا شگاف پڑنے کے بعد پانی کا ریلا درگاہ ملوک شاہ بخاری میں داخل ہو گیا۔ پانی اب تیزی سے زرعی علاقوں اور نزدیکی آبادیوں کی طرف بڑھ رہا ہے۔

ادھر کشمور میں دریائے سندھ میں گڈو بیراج کے مقام پر پانی کے بہاؤ میں نمایاں اضافہ ریکارڈ کیا گیا ہے، جس کے باعث اونچے درجے کا سیلاب برقرار ہے۔ حکام کے مطابق آئندہ 48 گھنٹوں میں یہ سیلابی ریلا سکھر بیراج تک پہنچنے کا امکان ہے۔

انتظامیہ کا کہنا ہے کہ گڈو بیراج فی الوقت محفوظ ہے اور کسی فوری خطرے کا سامنا نہیں، تاہم کچے کے علاقوں میں پانی کی سطح بلند ہونے کے بعد 30 ہزار سے زائد افراد کو محفوظ مقامات پر منتقل کیا جا چکا ہے۔ انخلا کا عمل اب بھی جاری ہے۔

دوسری جانب ضلع گھوٹکی کے علاقے جان محمد علی میں سیلابی پانی نے متعدد دیہات کو اپنی لپیٹ میں لے لیا ہے۔ مقامی افراد کا کہنا ہے کہ انخلا کا عمل تاخیر کا شکار ہے، جس کی وجہ سے متاثرہ خاندان شدید مشکلات سے دوچار ہیں۔