بلوچستان-سندھ سرحد پر دو دھماکے، 3 افراد جاں بحق

بلوچستان کے ضلع ڈیرہ بگٹی میں سندھ اور بلوچستان کی سرحد کے قریب واقع علاقے یارو پٹ میں بارودی سرنگ کے دو الگ الگ دھماکوں کے نتیجے میں 3 افراد جان کی بازی ہار گئے، جب کہ 4 افراد زخمی ہو گئے۔

ڈان نیوز کی رپورٹ کے مطابق یہ دھماکے سرحدی علاقے یارو پٹ میں پیش آئے، جہاں بارودی مواد پھٹنے سے جانی نقصان ہوا۔ زخمیوں میں خواتین اور بچے بھی شامل ہیں۔

تمام زخمیوں اور جاں بحق افراد کو فوری طور پر قریبی اسپتال منتقل کیا گیا، جہاں زخمیوں کو طبی امداد دی جا رہی ہے۔

دھماکوں کے بعد سیکیورٹی فورسز اور پولیس کی بھاری نفری نے علاقے کو گھیرے میں لے کر سرچ آپریشن شروع کر دیا ہے تاکہ ممکنہ مزید بارودی سرنگوں کی تلاش کی جا سکے اور ذمہ دار عناصر کو گرفتار کیا جا سکے۔