شاپنگ لنکس اور AI فیچرز: یوٹیوب نے آمدنی کے ذرائع میں توسیع کر دی

ویڈیو شیئرنگ پلیٹ فارم یوٹیوب نے مواد تخلیق کرنے والوں (کریئیٹرز) کے لیے آمدنی حاصل کرنے کے مزید مواقع فراہم کر دیے ہیں۔

نیویارک میں منعقدہ "میڈ آن یوٹیوب" ایونٹ کے دوران کمپنی نے صارفین کو یوٹیوب سے کمانے کے نئے طریقے متعارف کرانے کا اعلان کیا۔

یوٹیوب کے مطابق، اب تخلیق کار برانڈ ڈیلز اور یوٹیوب شاپنگ پروگرام کے ذریعے مزید آمدنی حاصل کر سکیں گے۔ کمپنی نے ویڈیوز میں پراڈکٹ ٹیگز کے لیے خودکار ٹائم اسٹیمپس اور اہل اشیاء کی خودکار ٹیگنگ کی سہولت بھی متعارف کرائی ہے۔

مزید یہ کہ، یوٹیوب شارٹس کے لیے بھی "برانڈ لنک" فیچر شامل کر دیا گیا ہے، جس سے صارفین اپنی شارٹس میں براہِ راست کسی برانڈ کی ویب سائٹ کا لنک شامل کر سکیں گے تاکہ ناظرین آسانی سے متعلقہ مصنوعات تلاش اور خرید سکیں۔

برانڈ اسپانسرشپس کے لیے کمپنی کی نئی پالیسی کے تحت تخلیق کار طویل ویڈیوز میں برانڈز کی شمولیت ممکن بنا سکیں گے۔ اس ماڈل میں ایک اہم تبدیلی یہ ہے کہ تخلیق کار ایک بار مکمل ہونے والے برانڈ معاہدے کے بعد اس سلاٹ کو کسی دوسرے اسپانسر کو بیچ سکیں گے۔

کمپنی نے واضح کیا ہے کہ یہ نیا اسپانسرشپ ماڈل ابتدائی طور پر آئندہ سال محدود پیمانے پر آزمائش کے لیے متعارف کرایا جائے گا۔

یوٹیوب کے مطابق ایک نئی AI پر مبنی ٹیکنالوجی کریئیٹرز کو یہ تجویز دے گی کہ ویڈیو میں کس لمحے پراڈکٹ ٹیگ شامل کیا جائے، اور یہ خودکار ٹیگنگ سال کے اختتام تک دستیاب کر دی جائے گی۔

یوٹیوب نے مزید کہا کہ شارٹس بنانے والے تخلیق کار اب اپنے ویڈیوز میں کسی برانڈ کے صفحے کا لنک شامل کر سکیں گے، جس سے وہ ناظرین کو اپنی مصنوعات کی جانب آسانی سے رہنمائی فراہم کر سکیں گے۔ اس سے برانڈز کو بھی واضح نتائج دکھائے جا سکیں گے۔

اس کے علاوہ، یوٹیوب جلد برانڈز کو ان کریئیٹرز کی فہرست فراہم کرے گا جو اسپانسرشپ یا پارٹنرشپ کے لیے موزوں ہوں گے۔ یہ سہولت گوگل ایڈز کے اندر موجود ایک ٹیب کے ذریعے میسر ہو گی، جس کا مقصد برانڈز اور کریئیٹرز کے درمیان براہِ راست رابطے کو فروغ دینا ہے۔

یوٹیوب نے یہ بھی اعلان کیا ہے کہ یوٹیوب شاپنگ پروگرام کو مزید مارکیٹوں، خصوصاً برازیل، تک وسعت دی جا رہی ہے۔

کمپنی کے مطابق، پچھلے چار برسوں میں یوٹیوب نے کریئیٹرز، فنکاروں، اور میڈیا کمپنیوں کو مجموعی طور پر 100 ارب ڈالر سے زائد کی ادائیگیاں کی ہیں۔