پنجاب میں ذخیرہ شدہ 2 لاکھ ٹن گندم برآمد، آٹے کی قیمتوں میں پھر اضافہ

پنجاب بھر کے 200 سے زائد گوداموں میں چھپائی گئی گندم کو سرکاری تحویل میں لے لیا گیا ہے۔

وزارتِ خوراک کے ذرائع کے مطابق، گندم ذخیرہ اندوزوں نے مہنگے داموں فروخت کرنے کی نیت سے ذخیرہ کر رکھی تھی۔

ذرائع کا کہنا ہے کہ قبضے میں لی گئی گندم کی مقدار 2 لاکھ ٹن ہے، جسے فلور ملوں کو 3 ہزار روپے فی من کے حساب سے فراہم کرنے کی ہدایت جاری کر دی گئی ہے۔

ادھر مارکیٹ ذرائع کے مطابق، گندم کی سپلائی میں کمی کے باعث قیمت میں 400 روپے فی من اضافہ ہو چکا ہے، جس کے بعد گندم کی قیمت ایک بار پھر 3400 روپے فی من تک پہنچ گئی ہے۔

ذرائع کے مطابق محکمہ خوراک کے گوداموں میں ذخائر ختم ہو چکے ہیں، جب کہ بلوچستان میں گندم کا شدید بحران پیدا ہو گیا ہے۔

فلور ملز ایسوسی ایشن کے ذرائع کا کہنا ہے کہ ملز کو گندم کی فراہمی محدود ہو چکی ہے، جس کے باعث صرف محدود تعداد میں 20 کلو کے تھیلے فراہم کیے جا رہے ہیں۔ اس وقت آٹے کا 20 کلو کا تھیلا مارکیٹ میں 1800 روپے میں دستیاب ہے۔

چکی مالکان کے مطابق، چکی آٹے کی قیمت بدستور 140 روپے فی کلو برقرار ہے۔