اٹک میں آٹا و گندم خیبر پختونخوا اسمگل کرنے کی کوشش ناکام

اٹک میں پولیس نے بروقت کارروائی کرتے ہوئے پنجاب سے خیبر پختونخوا اسمگل کیے جانے والے آٹا اور گندم کی بڑی کھیپ کو قبضے میں لے لیا۔

پولیس حکام کے مطابق کارروائی ایم 14 انٹرچینج، فتح جنگ کے قریب عمل میں لائی گئی، جہاں پنجاب کے مختلف شہروں کی فلور ملز سے سامان لاد کر خیبر پختونخوا منتقل کیا جا رہا تھا۔ کارروائی کے دوران 20 مال بردار ٹرک روک کر ان کی تلاشی لی گئی، جن سے مجموعی طور پر 323 ٹن آٹا اور 512 من سے زائد گندم برآمد کی گئی۔ پولیس نے اشیائے خورونوش کو قبضے میں لے کر قانونی کارروائی کا آغاز کر دیا ہے۔

حکام کا کہنا ہے کہ غذائی اجناس کی غیرقانونی نقل و حمل کے خلاف کارروائیاں جاری رکھی جائیں گی تاکہ صوبے میں سپلائی چین متاثر نہ ہو۔