پاکستان ٹیم کی بھارت سے قبل پریس کانفرنس منسوخ، وجوہات سامنے نہ آ سکیں

پاکستان کرکٹ ٹیم نے ایشیا کپ 2025 کے سپر فور مرحلے میں بھارت کے خلاف 21 ستمبر، اتوار کو دبئی انٹرنیشنل اسٹیڈیم میں ہونے والے اہم ترین میچ سے قبل اپنی شیڈول پریس کانفرنس منسوخ کر دی ہے۔

ٹیم منیجمنٹ نے اس فیصلے کی تصدیق کی، جب کہ ایشیا کپ انتظامیہ نے بھی باضابطہ طور پر پریس کانفرنس کے منسوخ ہونے کی تصدیق کی ہے، تاہم اس کی کوئی باقاعدہ وجہ نہیں بتائی گئی۔ یہ دوسرا موقع ہے جب پاکستان ٹیم نے ٹورنامنٹ کے دوران پری میچ میڈیا بریفنگ سے گریز کیا ہے؛ اس سے قبل گروپ مرحلے میں متحدہ عرب امارات کے خلاف میچ سے قبل بھی پریس کانفرنس نہیں کی گئی تھی۔

اس بار پریس کانفرنس کی منسوخی ایسے وقت پر سامنے آئی ہے جب بھارت کے ساتھ گزشتہ میچ کے بعد "ہینڈ شیک تنازع" نے شائقین اور کرکٹ تجزیہ کاروں کی توجہ حاصل کر رکھی ہے۔ اگرچہ ٹیم نے میڈیا سے بات نہ کرنے کا فیصلہ کیا ہے، لیکن میدان میں تیاریوں کا سلسلہ بھرپور انداز میں جاری ہے اور کھلاڑی بھارت کے خلاف اہم میچ کے لیے مکمل فوکس کے ساتھ مشقوں میں مصروف ہیں۔