کابل نے بگرام ایئربیس امریکا کو واپس نہ کیا تو اس کے سنگین نتائج ہوں گے، ٹرمپ کی دھکمی

امریکی صدر ڈونلڈ ٹرمپ نے ورجینیا میں ایک تقریب سے خطاب کرتے ہوئے ایک بار پھر دعویٰ کیا ہے کہ انہوں نے پاکستان، بھارت، ایران اور اسرائیل سمیت دنیا میں سات بڑی جنگیں رکوا کر عالمی سطح پر امن قائم کرنے میں کردار ادا کیا۔

ٹرمپ نے کہا کہ امریکی بی ٹو بمبار طیاروں نے ایران میں نیوکلیئر سائٹس کو تباہ کر دیا ہے تاکہ دنیا کو خطرناک ہتھیاروں سے محفوظ رکھا جا سکے۔

ٹرمپ نے  سوشل میڈیا پلیٹ ٹروتھ سوشل پر بیان جاری کرتے ہوئے کہاکہ 'اگر افغانستان بگرام ائیربیس  واپس نہیں دیتا جنہوں نے اسے بنایا یعنی امریکا، تو بہت بر اہوگا'۔

امریکی اخبار کے مطابق امریکا اور طالبان کے درمیان انسداد دہشت گردی کارروائیوں پر مذاکرات ہو رہے ہیں ۔بگرام ائیربیس پر محدود تعداد میں امریکی فوج کی تعیناتی پر غور کیا جا رہاہے ۔ 

If Afghanistan doesn’t give Bagram Airbase back to those that built it, the United States of America, BAD THINGS ARE GOING TO HAPPEN!!! President DJT

(TS: 20 Sep 17:29 ET)​​​‍​​‌‍​​‌‍​​​​​​‌‍​​​‌‍​​​​‌‍​​​​​​​​​‌‍​​​​​​​​‌‍​​​​‌‍​​​‌‍​​​​​​​​​‌‍​​​​​​​​​​‌‍​​​​​​​‌‍​​​​​​​‌‍…

— Trump Truth Social Posts On X (@TrumpTruthOnX) September 20, 2025

اس سے پہلے ٹرمپ کہہ چکے ہیں کہ بگرام ائیربیس امریکا کو نہیں چھوڑنا چاہیے تھا۔بگرام فوجی ائیر بیس واپس لینے کی کوشش کر رہے ہیں ، یہ ائیر بیس اس لیے بھی حاصل کرنا چاہتے ہیں کیونکہ یہ اُس مقام سے صرف ایک گھنٹے کے فاصلے پر ہے جہاں چین اپنے جوہری ہتھیار تیار کرتا ہے ۔

واضح رہے کہ گزشتہ دنوں ڈونلڈ ٹرمپ نے برطانیہ کے دورے پر برطانوی وزیر اعظم کیئر اسٹارمر کے ساتھ پریس کانفرنس کرتے ہوئے کہا تھا کہ  ہم نے طالبان کو بگرام ائر بیس مفت میں دے دی لیکن اب ہم اسے واپس لینے کی کوش کررہے ہیں۔

ٹرمپ نے صحافیوں سے کہا کہ یہ شاید ایک بریکنگ نیوز ہو لیکن ہم اس ائیر بیس کو واپس لینے کی کوشش کررہے ہیں۔

یاد رہے کہ 2021 میں افغانستان سے غیر ملکی افواج کے انخلا کے دوران امریکا نے 20 سال بعد بگرام ائیربیس افغان حکام کے حوالے کر دی تھی۔تاہم صدر ٹرمپ نے افغانستان سے انخلا کے وقت چھوڑا گیا اسلحہ اور بگرام ائیر بیس واپس لینے کا اعلان کیا ہے اور اب باقائدہ طور پر امریکا اور افغانستان کے درمیان اس معاملے پر مذاکرات کا آغاز ہوچکا ہے۔ 

ٹرمپ نے یورپی ممالک پر تنقید کرتے ہوئے کہا کہ وہ اب بھی روس سے تیل خرید رہے ہیں، جو ناقابل قبول ہے۔ انہوں نے کہا کہ امریکا میں مہنگی ادویات اور منشیات کی فروخت جاری ہے۔

ان کا کہنا تھا کہ اب کسی کو امریکا سے فائدہ اٹھانے کی اجازت نہیں دی جائے گی۔ مختلف ممالک پر ٹیرف عائد کرنے کے فیصلے سے امریکا کو اربوں ڈالرز کا فائدہ ہو رہا ہے۔

ٹرمپ نے وینزویلا کو خبردار کیا کہ اگر امریکا سے ملک بدر کئے گئے قیدی واپس نہ لیے گئے تو اسے ناقابل حساب قیمت چکانا پڑے گی۔ ان کا کہنا تھا کہ وینزویلا نے امریکا کو ذہنی مریض بھیجے ہیں جو کسی صورت قابل برداشت نہیں۔

خطاب کے دوران صدر ٹرمپ نے اپنے حالیہ دورہ برطانیہ کا ذکر کرتے ہوئے کہا کہ شاہ چارلس ایک بہترین انسان ہیں اور ان کے دورے کے دوران امریکا کی عزت و وقار میں اضافہ ہوا ہے۔