توشہ خانہ ٹو کیس: بانی پی ٹی آئی اوراہلیہ بشریٰ بی بی کے خلاف آخری 2گواہان نے بیانات ریکارڈ کرا دیے

راولپنڈی : پاکستان تحریک انصاف ( پی ٹی آئی ) کے بانی چئیرمین اور سابق وزیراعظم عمران خان اور ان کی اہلیہ بشریٰ بی بی کے خلاف توشہ خانہ ٹو کیس میں آخری دو گواہان نے بیان ریکارڈ کرا دیے۔

تفصیلات کے مطابق توشہ خانہ ٹو کیس کی سماعت اڈیالہ جیل میں ہوئی جس دوران بانی پی ٹی آئی عمران خان اور ان کی اہلیہ بشریٰ بی بی کو کمرہ عدالت میں پیش کیا گیا۔

بانی پی ٹی آئی کے وکلاء ارشد تبریز، ظہیر عباس اور بیرسٹر علی ظفر عدالت میں پیش ہوئے جبکہ وفاقی پراسیکیوٹر ذوالفقار عباس نقوی اور بیرسٹر عمیر مجید ٹیم کے ہمراہ پیش ہوئے۔

دوران سماعت استغاثہ نے کیس کے آخری دو گواہوں کے بیانات ریکارڈ کروائے، گواہان میں نیب کے تفتیشی افسر محسن ہارون اور ایف آئی اے کے تفتیشی افسر شاہد پرویز شامل تھے۔

خیال رہےکہ اب تک توشہ خانہ ٹو کیس میں مجموعی طور پر 20 گواہان کے بیانات ریکارڈ کیے گئے، اٹھارہ پر جرح مکمل کرلی گئی۔

عدالت نے توشہ خانہ ٹو کیس کی مزید سماعت 24 ستمبر تک ملتوی کر دی۔