پاکستانی ویمن ٹیم کی شاندار فتح، جنوبی افریقہ کو آخری ون ڈے میں 6 وکٹوں سے ہرا دیا

لاہور کے قذافی اسٹیڈیم میں کھیلے گئے تین میچوں کی سیریز کے آخری ون ڈے میں پاکستان ویمن ٹیم نے جنوبی افریقہ کو 6 وکٹوں سے شکست دے دی۔ اس کامیابی کے ساتھ پاکستان نے سیریز کا اختتام جیت کے ساتھ کیا، تاہم مجموعی طور پر سیریز 1-2 سے جنوبی افریقہ کے نام رہی۔

میچ میں جنوبی افریقی کپتان لاورا وولوارڈٹ نے ٹاس جیت کر پہلے بیٹنگ کا فیصلہ کیا، لیکن مہمان ٹیم کی بیٹنگ لائن پاکستانی اسپنرز کے سامنے بے بس نظر آئی۔ پوری ٹیم صرف 115 رنز پر ڈھیر ہو گئی۔ وولوارڈٹ نے 28 رنز کی اننگز کھیلی، لیکن دیگر کھلاڑی خاطر خواہ کارکردگی نہ دکھا سکیں۔

پاکستان کی جانب سے اسپنر نشرا سندھو نے تباہ کن باؤلنگ کرتے ہوئے 9 اوورز میں محض 26 رنز دے کر 6 وکٹیں حاصل کیں۔ اروب شاہ نے 2، جب کہ ڈیانا بیگ اور عمائمہ سہیل نے ایک ایک کھلاڑی کو آؤٹ کیا۔

116 رنز کے ہدف کے تعاقب میں پاکستان کی ابتدائی بیٹنگ مشکلات کا شکار رہی، جب عمائمہ سہیل صفر پر آؤٹ ہو گئیں۔ تاہم مونیبہ علی (44 رنز، 76 گیندیں) اور سدرہ امین (ناٹ آؤٹ 50 رنز، 94 گیندیں) نے شاندار شراکت قائم کی۔

ناتالیہ پرویز نے بھی 14 رنز کی مفید اننگز کھیلی اور پاکستان نے 31ویں اوور میں ہدف حاصل کر کے میچ اپنے نام کیا۔