جسٹس محسن اختر کیانی کی عدالتی نظام پر برہمی، "دل کرتا ہے کورٹ کو ہی جرمانہ کردوں"

اسلام آباد ہائی کورٹ کے جسٹس محسن اختر کیانی نے کیس کی سماعت کے دوران عدالتی نظام اور وکلا کے رویے پر سخت برہمی کا اظہار کیا۔ کمپنی رجسٹریشن سے متعلق ایس ای سی پی کے خلاف کیس میں درخواست گزار کے وکیل کی جانب سے التوا کی استدعا پر انہوں نے سخت ریمارکس دیے۔

جسٹس کیانی نے کہا "افسوس ہوتا ہے جب کوئی وکیل آ کر صرف تاریخ مانگتا ہے۔ سمجھ نہیں آتی کہ وکیل اور جج کام کیوں نہیں کرنا چاہتے۔ مجھے اپنے آپ سے شرم آتی ہے، دل کرتا ہے کورٹ کو ہی جرمانہ کر دوں۔"

انہوں نے مزید کہا کہ اس کیس میں اب تک 20 تاریخیں دی جا چکی ہیں۔ تاہم، عدالت نے وکیل کی استدعا پر مزید التوا دے دیا۔

اسی روز بورڈ آف ریونیو کے فیصلے کے خلاف ایک علیحدہ کیس کی سماعت کے دوران بھی جسٹس کیانی نے واضح ریمارکس دیے۔ انہوں نے درخواست گزار کے وکیل سے کہا "آپ اپنا مقدمہ سول کورٹ لے جائیں، کیونکہ سول عدالت کا دائرہ اختیار وسیع تر ہے۔ سول جج ڈپٹی کمشنر کو توہین عدالت کا نوٹس دے کر معاملہ اسٹیبلشمنٹ ڈویژن تک بھیج سکتا ہے۔"

وکیل نے مؤقف اختیار کیا کہ ان کے کیس میں ڈپٹی کمشنر کے وکیل نے سول جج کے دائرہ اختیار کو چیلنج کیا ہے۔

جسٹس کیانی نے جواباً کہا "وکیل کا کام ہوتا ہے کہ اگر جج بکری بنا ہوا ہو تو اُسے شیر بنا دے۔ جب صحیح جج تعینات ہوں گے تو ہائی کورٹ اور سپریم کورٹ تک نظام خودبخود بہتر ہو جائے گا۔"