پاکستان نے کامن ویلتھ بیچ ہینڈ بال چیمپئن شپ کا ٹائٹل اپنے نام کر لیا

مالدیپ میں ہونے والی کامن ویلتھ بیچ ہینڈ بال چیمپئن شپ کے فائنل میں پاکستان نے شاندار کارکردگی کا مظاہرہ کرتے ہوئے سری لنکا کو 0-2 سے شکست دے دی اور ٹورنامنٹ کی چیمپئن بن گئی۔

فائنل میں پاکستان نے دونوں ہافز میں مکمل برتری قائم رکھی، پہلا ہاف 18-26 جبکہ دوسرا ہاف 12-28 کے واضح فرق سے جیتا۔ پاکستان کی ٹیم پورے ایونٹ میں ناقابل شکست رہی۔

اس سے قبل اتوار کے روز سیمی فائنل میں پاکستان نے بنگلادیش کو شکست دے کر فائنل میں رسائی حاصل کی تھی، جبکہ افتتاحی میچ میں پاکستان نے روایتی حریف بھارت کو بھی 0-2 سے شکست دے کر فاتحانہ آغاز کیا تھا۔

پاکستان کی اس جیت کو کھیلوں کے حلقوں میں بڑی کامیابی قرار دیا جا رہا ہے، کیونکہ ٹیم نے پورے ٹورنامنٹ میں تسلط قائم رکھتے ہوئے ایک بھی میچ نہیں ہارا۔