پی ٹی آئی کا ریاست مخالف کوئی ایجنڈا نہیں، ملک بھی ہمارا ہے، فوج بھی ہماری ہے: بیرسٹر گوہر

پاکستان تحریک انصاف کے چیئرمین بیرسٹر گوہر نے کہا ہے کہ پارٹی کا مؤقف کبھی ریاست مخالف نہیں رہا، اور بانی چیئرمین عمران خان نے واضح الفاظ میں کہا ہے کہ "ملک بھی ہمارا ہے اور فوج بھی ہماری ہے"۔

اڈیالہ جیل کے باہر میڈیا سے گفتگو کرتے ہوئے بیرسٹر گوہر نے بتایا کہ آج انہیں عمران خان سے ملاقات کی اجازت نہیں دی گئی، تاہم امید ہے کہ کل ملاقات ممکن ہو سکے گی۔ ان کا کہنا تھا کہ یہ ملاقات عدالتی احکامات کے مطابق ضروری ہے اور اس سے سیاسی کشیدگی میں کمی آ سکتی ہے۔

انہوں نے کہا کہ ملک اس وقت ایک طرف قدرتی آفات کا سامنا کر رہا ہے اور دوسری طرف ایک غیر یقینی اور ہیجانی صورتحال ہے۔ اگر قائدین کو بات کرنے کا موقع نہ دیا گیا تو فاصلوں میں اضافہ ہوگا۔

پی ٹی آئی چیئرمین کا کہنا تھا کہ پارٹی عمران خان کی ہدایت پر عمل کرتی ہے، نہ کہ سوشل میڈیا پر چلنے والے بیانیے پر۔ "ہم آئین کی بالادستی اور جمہوریت کی حمایت میں ہیں، ریاست مخالف کسی ایجنڈے کا حصہ نہیں۔"

انہوں نے کہا کہ "پاکستان کی بات ہو تو پوری قوم متحد ہو جاتی ہے، بھارت کے خلاف چھ-صفر کی جیت اس کی واضح مثال ہے، ایسی جیت دنیا نے کم دیکھی ہے۔"