متنازع ٹویٹ کا معاملہ : ایمان مزاری  اور ان کے شوہر ہادی علی چھٹہ کی راہداری ضمانت منظور

پشاور ہائی کورٹ نے ایمان مزاری ایڈووکیٹ اور ان کے شوہر ہادی علی چھٹہ ایڈووکیٹ کو 9 اکتوبر تک راہداری ضمانت دے دی۔

تفصیلات کے مطابق ایمان مزاری ایڈووکیٹ اور ہادی علی چھٹہ ایڈووکیٹ کی راہداری ضمانت کی درخواست پر سماعت ہوئی، سماعت چیف جسٹس ایس ایم عتیق شاہ نے کی۔

دوران سماعت ایمان مزاری کے وکلا عطاء اللہ کنڈی، جہانزیب محسود، طارق افغان، اور ایڈیشنل اٹارنی جنرل ثناء اللہ عدالت میں پیش ہوئے۔

سماعت کےدوران درخواست گزارکے وکیل عطاء اللہ کنڈی ایڈووکیٹ نے مؤقف اپنایا کہ درخواست گزار اسلام آباد میں وکیل ہے، سماجی کارکن ہے، درخواست گزارہ کے خلاف اسلام آباد میں مقدمہ درج کیا گیا ہے۔

جس پر چیف جسٹس ایس ایم عتیق شاہ  نے استفسار کیا کہ  یہ دونوں وکیل ہیں؟،  وکیل درخواست گزار نے جواب دیا کہ جی دونوں درخواست گزار وکیل ہیں اور عدالت میں پیش ہونا چاہتے ہیں۔

چیف جسٹس ایس ایم عتیق شاہ نے پوچھا کہ آپ پہلی بار پشاور آئی ہیں؟جس پر ایمان مزاری نے جواب دیا کہ جی میں پہلی بار پشاور ہائیکورٹ میں آئی ہوں۔

چیف جسٹس ایس ایم عتیق شاہ نے کہا کہ چلو آپ ایف آئی آر کے بہانے پشاور تو آئیں، آپ لوگ تو ویسے بھی خیبرپختونخوا نہیں آتے،جس پر وکیل ایمان مزاری عطاء اللہ کنڈی ایڈووکیٹ  نے کہا کہ ایمان مزاری خیبرپختونخوا اور بلوچستان کے مظلوم لوگوں کی آواز ہے۔

بعد ازاں عدالت نے ایمان مزاری اور ہادی علی چٹھہ کی 9 اکتوبر تک حفاظتی ضمانت منظور ہونے کے بعد متعلقہ عدالت میں پیش ہونے کی ہدایات کی۔