یوکرین تنازع: پاکستان کی غیر جانبداری قابلِ تحسین ہے، روسی سفیر

اسلام آباد: پاکستان میں تعینات روسی سفیر البرٹ پی خورف نے کہا ہے کہ پاکستان یوکرین تنازع میں غیر جانبدارانہ مؤقف پر قائم ہے، اور ہم پاکستانی حکومت کے اس فیصلے پر شکر گزار ہیں کہ اس نے بیرونی دباؤ کے باوجود اپنی غیر جانبداری برقرار رکھی۔

اسلام آباد میں ایک پریس کانفرنس کے دوران روسی سفیر نے کہا کہ پاکستان، یوکرین تنازع کے سفارتی حل کا حامی ہے، اور اس حوالے سے پاکستان کا مؤقف روس کے مؤقف سے مکمل ہم آہنگی رکھتا ہے۔

البرٹ پی خورف نے بتایا کہ مئی 2025 میں روس اور یوکرین کے درمیان براہ راست مذاکرات کا عمل دوبارہ شروع ہوا ہے، جو اس سے قبل اپریل 2022 میں یوکرین کی جانب سے معطل کر دیا گیا تھا۔ ان مذاکرات کے تین ادوار میں قیدیوں کے تبادلے جیسے مثبت نتائج سامنے آئے۔ ان کے مطابق یوکرین کو امن کے لیے سنجیدہ ہونے کے تین مواقع میسر آئے۔

روسی سفیر نے مزید کہا کہ یوکرین اور بعض یورپی ممالک فوری جنگ بندی پر زور دے رہے ہیں، تاہم ان کا مقصد جنگ بندی کے دوران یورپی مالی و عسکری امداد سے اپنی فوج کو دوبارہ منظم کرنا ہے۔ ان کے مطابق یوکرین کو اب تک مجموعی طور پر 70.2 ارب ڈالر کی امداد فراہم کی جا چکی ہے۔