مستونگ میں ریلوے ٹریک پر دھماکہ، جعفر ایکسپریس کی 6 بوگیاں پٹڑی سے اتر گئیں

مستونگ: بلوچستان کے ضلع مستونگ کے نواحی علاقے اسپیزنٹ میں ریلوے ٹریک پر دھماکے کے نتیجے میں جعفر ایکسپریس کی 6 بوگیاں پٹڑی سے اتر گئیں، جس کے باعث 4 افراد زخمی ہو گئے۔

سیکیورٹی حکام اور ریلوے ذرائع کے مطابق، پشاور سے کوئٹہ جانے والی جعفر ایکسپریس اپنے معمول کے راستے پر رواں دواں تھی کہ اسپیزنٹ کے مقام پر نصب دھماکا خیز مواد ریموٹ کنٹرول سے اڑا دیا گیا۔ ٹرین میں 270 مسافر سوار تھے۔

ریلوے کوئٹہ ڈویژن کے ترجمان محمد کاشف نے تصدیق کی کہ واقعے کے بعد ریلیف ٹرین کوئٹہ سے روانہ کر دی گئی ہے اور امدادی کارروائیاں جاری ہیں، جن میں ریسکیو ٹیمیں، افسران، پرائیویٹ کرینیں اور ٹرک شامل ہیں۔

ریلوے حکام کے مطابق، ٹریک کی مرمت اور متاثرہ بوگیوں کو ہٹانے کا کام دن کی روشنی میں شروع کیا جائے گا، جبکہ واقعے کی تحقیقات کا آغاز کر دیا گیا ہے۔

بلوچستان کے محکمہ صحت اور سول ہسپتال کوئٹہ کے ترجمان ڈاکٹر وسیم بیگ کے مطابق، زخمیوں میں سے تین کو سول ہسپتال ٹراما سینٹر منتقل کیا گیا ہے، جبکہ ایک زخمی بچے کو کمبائنڈ ملٹری اسپتال (CMH) منتقل کیا گیا ہے۔

دھماکے کے فوراً بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔