صدر میکرون کو نیویارک کی سڑک پر پولیس نے روک لیا ، ٹرمپ کو فون کرنا پڑا

نیویارک: اقوام متحدہ کی جنرل اسمبلی میں شرکت کے لیے نیویارک پہنچنے والے فرانسیسی صدر ایمانوئل میکرون کو اُس وقت دلچسپ صورتحال کا سامنا کرنا پڑا جب امریکی صدر ڈونلڈ ٹرمپ کے قافلے کی وجہ سے ان کا راستہ بند کر دیا گیا۔

واقعہ اس وقت پیش آیا جب صدر میکرون اقوام متحدہ کی فلسطین سے متعلق کانفرنس میں شرکت کے بعد قریب ہی واقع فرانسیسی سفارت خانے کی جانب روانہ ہوئے۔ تاہم جیسے ہی ان کا قافلہ روانہ ہوا، انہیں راستے میں روک دیا گیا۔

پولیس اہلکاروں نے بتایا کہ صدر ٹرمپ کے قافلے کا پروٹوکول لگ چکا ہے، اور جب تک وہ نہیں گزرتے، راستہ نہیں کھولا جا سکتا۔

صدر میکرون نے پہلے خود گاڑی سے اتر کر پولیس افسران سے نرمی سے بات کی، مگر انہیں مؤدبانہ انداز میں سمجھا دیا گیا کہ "معذرت، ابھی راستہ بند ہی رہے گا۔"

اس پر میکرون نے بھی ہار نہ مانی اور وہیں سڑک پر کھڑے ہو کر صدر ٹرمپ کو فون ملا دیا۔ فون پر خیر خیریت دریافت کرنے کے بعد میکرون نے ہنستے ہوئے ٹرمپ سے پوچھا "اچھا، ذرا اندازہ لگائیں کہ میں نے آپ کو فون کیوں کیا ہے؟"ٹرمپ کے مبینہ ردعمل پر میکرون نے ہنستے ہوئے کہا:

"میں سڑک پر کھڑا ہوں اور راستہ بند ہے، کیونکہ آپ نے گزرنا ہے!"

تاہم صدر ٹرمپ سے رابطے کے باوجود بھی راستہ نہ کھل سکا، اور فرانس کے صدر کو مزید انتظار کرنا پڑا۔

انتظار سے تنگ آ کر میکرون نے پیدل ہی سفارت خانے جانے کا فیصلہ کیا، مگر پولیس نے انہیں اکیلا سڑک پار کرنے کی اجازت بھی نہ دی۔ جب راستہ بالآخر کھلا تو میکرون نے گاڑی پر سوار ہونے کے بجائے پیدل چلنے کو ترجیح دی۔

راستے میں کئی شہریوں نے انہیں پہچان لیا اور ان کے ساتھ سیلفیاں بنوائیں۔

یاد رہے کہ فرانس نے حالیہ اقوام متحدہ کانفرنس کے دوران فلسطین کو باضابطہ طور پر ریاست تسلیم کرنے کا اعلان کیا ہے، جس کے بعد وہ برطانیہ، کینیڈا اور آسٹریلیا کے بعد یہ قدم اٹھانے والا چوتھا بڑا مغربی ملک بن گیا ہے۔