اقوامِ متحدہ خطرے میں، لیکن امید باقی ہے: سیکریٹری جنرل کا پرامید پیغام

نیویارک: اقوامِ متحدہ کے سیکریٹری جنرل انتونیو گوتریس نے جنرل اسمبلی کے سالانہ اجلاس کے افتتاحی خطاب میں کہا ہے کہ دنیا اس وقت "انتشار اور بحران کے عہد" سے گزر رہی ہے، جبکہ غزہ میں جاری تباہی تیسرے ہولناک سال میں داخل ہو چکی ہے۔

انہوں نے 193 رکنی اسمبلی کو بتایا کہ اقوامِ متحدہ کے قیام کے بنیادی اصول آج محاصرے میں ہیں، مگر اس کے باوجود تعاون کے ذریعے دنیا کو بہتر بنایا جا سکتا ہے۔

گوتریس کا کہنا تھا کہ دنیا ایک ایسے موڑ پر کھڑی ہے جہاں خودمختار ریاستوں پر حملے، بھوک کو بطور ہتھیار استعمال کرنا، سچائی کو دبانا، اور موسمیاتی تبدیلی کے سبب ساحلی علاقے صفحہ ہستی سے مٹ رہے ہیں۔

انہوں نے خاص طور پر تین جاری جنگوں — غزہ، یوکرین اور سوڈان — کا ذکر کرتے ہوئے کہا کہ ان تنازعات کا حل صرف سفارت کاری کے ذریعے ممکن ہے، لیکن غزہ کی صورتحال کو انہوں نے سب سے زیادہ انسانی المیہ قرار دیا۔"غزہ میں جو کچھ ہو رہا ہے وہ بنیادی انسانی اقدار کی نفی ہے۔ یہ میری مدتِ ملازمت کے دوران موت و تباہی کا سب سے بڑا پیمانہ ہے۔"

 اقوامِ متحدہ کی 80 ویں سالگرہ

80 ویں سالگرہ کے موقع پر گوتریس نے اقوامِ متحدہ کے قیام کو دوسری جنگِ عظیم کے بعد ایک "انسانیت کے لیے بقا کا عملی ماڈل" قرار دیا، اور کہا کہ یہ ادارہ آج بھی کثیرالجہتی، انسانی حقوق، ترقی اور امداد کے اصولوں پر قائم ہے۔

انہوں نے کہا:

"آیئے ایک ایسی اقوامِ متحدہ میں سرمایہ کاری کریں جو اختراع کرے، بدلے، اور دنیا کے ہر فرد کے لیے خدمات انجام دے۔"