پی ٹی آئی کارکن فلک جاوید خان کی گرفتاری، سلمان اکرم راجہ کا فلیٹ سے تعلق کی تردید

پاکستان تحریک انصاف (پی ٹی آئی) کی کارکن فلک جاوید خان کو گرفتار کر لیا گیا ہے، جس کی پی ٹی آئی کی جانب سے سوشل میڈیا پلیٹ فارم ایکس پر مذمت کی جا رہی ہے۔

فلک جاوید کی گرفتاری کے بعد سوشل میڈیا پر کہا جا رہا ہے کہ انہیں اسلام آباد کے سیکٹر ایف 10 میں واقع پی ٹی آئی رہنما سلمان اکرم راجہ کے فلیٹ سے گرفتار کیا گیا ہے۔

سلمان اکرم راجہ نے اس حوالے سے کہا: "مجھے فلک جاوید کی گرفتاری کی بھی خبر نہیں ہے کیونکہ میں سارا دن جیل میں رہا ہوں۔"

انہوں نے مزید کہا کہ "فلک جاوید ہمارے پی ٹی آئی کے لاہور کے ایک ورکر جاوید احمد خان کی بیٹی اور میاں شکیل کی اہلیہ ہیں اور دونوں سے میرا بہت اچھا رشتہ ہے۔"

ذرائع کے مطابق فلک جاوید کو گزشتہ رات سیکٹر ایف ٹین سے گرفتار کیا گیا، ان پر اشتعال انگیز مہم چلانے اور ریاستی اداروں کے خلاف تضحیک آمیز مواد پھیلانے کا الزام ہے۔ جس پا ان کے خلاف الیکٹرانک کرائم ایکٹ کے تحت مقدمات درج کیے گئے ہیں۔ فلک جاوید گزشتہ 16 ماہ سے روپوش تھیں۔

انہوں نے وضاحت کی: "پارٹی کے لاہور کے معاملات میں ان سے مشاورت رہتی ہے، لیکن میرے فلیٹ سے گرفتاری کی باتیں کرنے والوں کو شرم آنی چاہیے۔"

وی نیوز سے گفتگو کرتے ہوئے سلمان اکرم راجہ کے اسٹاف آفیسر محمد آصف نے بتایا کہ "اس بات میں کوئی حقیقت نہیں ہے کہ فلک جاوید کو سلمان اکرم راجہ کے فلیٹ سے گرفتار کیا گیا ہے۔"

محمد آصف نے مزید کہا کہ "سلمان اکرم راجہ کا اسلام آباد میں نہ تو کوئی مکان ہے اور نہ ہی کوئی فلیٹ ہے، اور اس حوالے سے سوشل میڈیا پر پھیلائی جانے والی خبریں جھوٹی ہیں۔"