شہریوں کیلئے اچھی خبر،سوئی ناردرن گیس نے نئے گھریلو کنکشن کی درخواستیں وصول کرنا شروع کر دیں

اسلام آباد: شہریوں کے لیے اچھی خبر سامنے آئی ہےسوئی ناردرن گیس پائپ لائنز لمیٹڈ (ایس جی پی ایل این )نے نئے گھریلو کنکشن کیلئے درخواستیں وصول کرنا شروع کر دی ہیں۔

تفصیلات کے مطابق ایس این جی پی ایل کی ویب سائٹ پر کہا گیا ہے کہ ان درخواست دہندگان کو ترجیح دی جائے گی جنہوں نے پابندی کے نفاذ سے پہلے ہی فوری فیس یا ڈیمانڈ نوٹس جمع کرا دیا تھا۔

سوئی ناردرن گیس کا کہنا ہے کہ درخواست دہندگان آر ایل این جی معاہدے پر دستخط کرنے اور سیکیورٹی کے فرق کی ادائیگی کے ذریعے کنکشن حاصل کر سکیں گے۔

کمپنی کے مطابق جن افراد نے پہلے ہی سسٹم گیس کنکشن کے خلاف درخواستیں جمع کرائی ہیں، وہ عام یا فاسٹ ٹریک میرٹ پر نئی آر ایل این جی پر مبنی درخواست جمع کرانے کا اختیار حاصل کر سکتے ہیں۔

نئے گیس کنکشن کے لیے فاسٹ ٹریک درخواست کی فیس 25 ہزار روپے رکھی گئی ہے۔نئے آر ایل این جی پر مبنی گیس کنکشن کے چارجز یہ ہے، سیکیورٹی (قابل واپسی) 20 ہزار روپے رکھی گئی ہے۔

اسی طرح دس مرلہ تک کے گھر کے لئے سروس لائن کی لاگت 15 سو روپے اور 10 مرلہ سے زائد کے گھر کے لیے 3 ہزار روپے رکھی گئی ہے۔ درخواستیں جمع کروانے کی کوئی فیس نہیں ہے۔

سوئی ناردرن گیس پائپ لائنز لمیٹڈ کے مطابق درآمدی آر ایل این جی کنکشن کا ٹیرف روایتی گھریلو گیس کے نرخوں کے مقابلے میں 70 فیصد زیادہ ہو گا۔