ژوب:گورنر بلوچستان کی رہائشگاہ پر فائرنگ ، 2 پولیس اہلکاروں سمیت 5 زخمی

ژوب : گورنربلوچستان جعفر خان مندوخیل کی رہائش گاہ کے باہر فائرنگ کی گئی جس کے نتیجے میں دو پولیس اہلکاروں سمیت 5 افراد زخمی ہو گئے۔

تفصیلات کے مطابق فائرنگ کا یہ افسوسناک واقعہ گورنر بلوچستا ن کی رہائشگاہ ژوب میں پیش آہا جہاں رہائش گاہ کے باہر پولیس اہلکار بھی موجود تھے جبکہ گورنر بلوچستان سے کچھ طلبہ ملنے آئے تھے، اس موقع پر پولیس اہلکاروں اور طلبہ کے درمیان تلخ کلامی بھی ہوئی۔

پولیس کا کہنا ہے کہ فائرنگ سے زخمی ہونے والوں میں 3 طلبہ اور 2 پولیس اہلکار شامل ہیں جنہیں فوری طبی امداد کے لیے سول اسپتال ژوب منتقل کر دیا گیا ہے۔

ریسکیو حکام کے مطابق فائرنگ سے زخمی ہونے والوں کی حالت خطرے سے باہر ہے۔

پولیس کا کہنا ہے کہ فائرنگ سے زخمی ہونے والے طلبا کا تعلق گورنمنٹ کالج ژوب سے ہے، پولیس نے مزید بتایا کہ پولیس اہلکار نے غلطی سے فائرنگ کی ہے جبکہ واقعے کی تحقیقات شروع کر دی گئی ہیں۔