بغیر حماس کے فلسطین کا حل ممکن نہیں: مولانا فضل الرحمٰن

لاہور: جمعیت علمائے اسلام (ف) کے سربراہ مولانا فضل الرحمٰن نے کہا ہے کہ فلسطین کے مسئلے کا کوئی بھی پائیدار حل حماس کو اصل فریق تسلیم کیے بغیر ممکن نہیں۔

لاہور میں پریس کانفرنس سے خطاب کرتے ہوئے انہوں نے کہا کہ بانیٔ پاکستان قائداعظم محمد علی جناح نے اسرائیل کو "ناجائز بچہ" قرار دیا تھا اور آج بھی پاکستان کا مؤقف اسی اصول پر قائم ہے۔

مولانا فضل الرحمٰن کا کہنا تھا کہ فلسطینی عوام کو اپنے مستقبل کے فیصلے کا حق حاصل ہے، اور کسی بھی زبردستی مسلط کردہ امن فارمولے کو قبول نہیں کیا جا سکتا۔

انہوں نے وزیراعظم شہباز شریف کے اقوام متحدہ کی جنرل اسمبلی میں دیے گئے بیان اور اس کے بعد سوشل میڈیا پر کی گئی ٹویٹ میں فرق کی نشاندہی کی، اور اسرائیلی وزیراعظم نیتن یاہو کے ساتھ مشترکہ پریس کانفرنس کو عالمی عدالت انصاف کی توہین قرار دیا، کیونکہ عدالت پہلے ہی نیتن یاہو کو مجرم قرار دے چکی ہے۔

ان کا کہنا تھا کہ امریکا کھلم کھلا اسرائیل کی پشت پناہی کر رہا ہے، جبکہ ٹرمپ اور نیتن یاہو کا امن منصوبہ دراصل اسرائیل کی توسیع کا ذریعہ ہے، جو نہ تو فلسطینی ریاست کی ضمانت دیتا ہے اور نہ بیت المقدس کی آزادی کا۔

مولانا فضل الرحمٰن نے زور دیا کہ اگر عالمی برادری مسئلہ فلسطین کے حل میں واقعی سنجیدہ ہے، تو سب سے پہلے بیت المقدس میں امریکی سفارتخانے کے قیام کے منصوبے کو ختم کیا جانا چاہیے۔

انہوں نے کہا کہ اسلامی دنیا فلسطین کی آزادی کے معاملے پر متحد ہے، اور اگر دو ریاستی حل قابل قبول سمجھا جا سکتا ہے، تو صرف اسی صورت میں جب ایک آزاد فلسطینی ریاست قائم ہو، جس کا دارالحکومت بیت المقدس ہو۔