ٹرمپ کا حماس کو الٹی میٹم: تین دن میں جواب نہ آیا تو "افسوسناک نتائج" ہوں گے

واشنگٹن: امریکی صدر ڈونلڈ ٹرمپ نے غزہ میں جنگ بندی سے متعلق اپنے تجویز کردہ منصوبے پر حماس کو تین سے چار دن کے اندر جواب دینے کا الٹی میٹم دے دیا ہے، بصورتِ دیگر "افسوسناک نتائج" کی وارننگ دی گئی ہے۔

غیر ملکی خبررساں اداروں کے مطابق، ٹرمپ کی مجوزہ امن اسکیم میں فوری جنگ بندی، 72 گھنٹوں کے اندر تمام یرغمالیوں کی رہائی، حماس کا غیر مسلح ہونا اور اسرائیلی افواج کا مرحلہ وار انخلا شامل ہے، جس کے بعد ایک عبوری فلسطینی انتظامیہ تشکیل دی جائے گی۔

اس منصوبے کو کئی عالمی طاقتوں اور مسلم ممالک نے خوش آئند قرار دیا ہے، تاہم حماس کی جانب سے تاحال باضابطہ ردعمل سامنے نہیں آیا۔

ٹرمپ نے صحافیوں سے گفتگو کرتے ہوئے کہا، ’’ہمارے پاس صرف تین یا چار دن ہیں، ہم حماس کے جواب کے منتظر ہیں۔ اگر انہوں نے جواب نہ دیا تو نتائج انتہائی افسوسناک ہو سکتے ہیں۔‘‘

یاد رہے کہ ٹرمپ نے یہ امن منصوبہ پیر کے روز اسرائیلی وزیر اعظم بنیامین نیتن یاہو کے ساتھ وائٹ ہاؤس میں ملاقات کے بعد پیش کیا تھا۔

منگل کے روز فلسطینی ذرائع نے بتایا کہ حماس کی سیاسی و عسکری قیادت — خواہ وہ غزہ میں ہو یا بیرون ملک — اس منصوبے پر مشاورت کر رہی ہے۔

قطری حکام کے مطابق، حماس نے اس منصوبے کا ’’ذمہ داری کے ساتھ‘‘ جائزہ لینے کی یقین دہانی کرائی ہے، اور ترکی میں ایک اہم اجلاس بھی منگل کو شیڈول کیا گیا ہے جس میں حماس کے نمائندے شریک ہوں گے۔