محکمہ موسمیات نے پیشگوئی کی ہے کہ 2 سے 7 اکتوبر کے دوران ملک بھر میں تیز آندھی، گرج چمک کے ساتھ بارش، ژالہ باری اور پہاڑی علاقوں میں برفباری کا سلسلہ جاری رہنے کا امکان ہے۔
اس دوران پنجاب اور وفاقی دارالحکومت اسلام آباد میں 3 سے 6 اکتوبر کے دوران بارش اور ژالہ باری متوقع ہے، جبکہ خیبرپختونخوا میں 2 سے 7 اکتوبر تک مختلف علاقوں میں بارشوں کے ساتھ بعض مقامات پر تیز آندھی اور ژالہ باری ہو سکتی ہے۔
کشمیر اور گلگت بلتستان میں 2 اور 3 اکتوبر کو بارش، جبکہ 4 سے 7 اکتوبر تک کشمیر کے بلند پہاڑی علاقوں میں برفباری کا امکان ہے، جس سے درجہ حرارت میں نمایاں کمی متوقع ہے۔
سندھ کے مختلف اضلاع میں آج رات سے 3 اکتوبر تک بارش ہو سکتی ہے، جبکہ بلوچستان کے متعدد علاقوں میں 4 سے 6 اکتوبر کے دوران بارش اور طوفانی ہوا چلنے کی پیشگوئی کی گئی ہے۔
محکمہ موسمیات نے خبردار کیا ہے کہ نشیبی علاقوں میں اربن فلڈنگ جبکہ ندی نالوں میں طغیانی کا خطرہ ہے، لہٰذا متعلقہ اداروں کو الرٹ رہنے اور پیشگی حفاظتی اقدامات کرنے کی ہدایت جاری کی گئی ہے۔
