اسرائیل غزہ پر جاری بمباری فوری طور پر بند کرے ،حماس امن معاہدے پر آمادہ ہے، ٹرمپ

واشنگٹن ڈی سی : امریکی صدر ڈونلڈ ٹرمپ نے اسرائیل پر زور دیا ہے کہ وہ غزہ پر جاری بمباری فوری طور پر بند کرے تاکہ محصور فلسطینیوں کو ریلیف پہنچایا جا سکے اور اسرائیلی یرغمالیوں کی بحفاظت رہائی ممکن ہو سکے۔  

تفصیلات کے مطابق امریکی صدرڈونلڈ ٹرمپ نےسوشل میڈیا پرپیغام میں کہایرغمالیوں کی محفوظ واپسی کےلئے اسرائیل کو فوراً بمباری روک دینی چاہئے،فی الحال یہ کام کرنا بہت خطرناک ہے،ہم تفصیلات پر بات کررہے ہیں یہ صرف غزہ کے بارے میں نہیں بلکہ مشرقِ وسطیٰ میں امن کے بارے میں ہے۔

ٹرمپ نے مزیدکہا کہ حماس کی جانب سے اس کے امن منصوبے کے کچھ حصے قبول کرنا اس بات کا ثبوت ہے کہ تنظیم پائیدار امن کے لیے تیار ہے۔

بیان میں امریکی صدر ٹرمپ نے زور دیا کہ یہ موقع صرف غزہ ہی نہیں بلکہ پورے مشرقِ وسطیٰ میں برسوں سے مطلوب امن قائم کرنے کے لیے استعمال ہونا چاہیے۔ 

ان کا کہنا تھاکہ آج ایک اہم پیشرفت ممکن ہوئی ہے،آج ایک بڑا اورتاریخی دن ہےجس کےنتائج جلد سامنے آئیں گے،اُن ممالک کا شکریہ جنہوں نے یہ سب ممکن بنانے میں مدد کی،ان میں سعودی عرب،قطر،مصر، اردن اور دیگر کئی ممالک شامل ہیں،سب ایک نکتے پرمتفق تھےکہ یہ جنگ ختم ہو اور امن قائم ہو،دیکھتے ہیں یہ سب کیسےنتیجہ خیز ہوتا ہے۔

ٹرمپ نے مزید کہا کہ ہم امن کےقیام کے انتہائی قریب ہیں،ہمیں اس معاہدے کو آخری شکل دینی ہے، امریکا اور ثالثی کرنے والے ممالک اس موقع کو غنیمت جانیں اور فریقین کو میز پر لا کر مستقل جنگ بندی کی راہ ہموار کریں۔ انہوں نے خبردار کیا کہ اگر پیش رفت نہ ہوئی تو نتائج تباہ کن ہوں گے۔

خیال رہے کہ امریکی صدر کا یہ بیان اس وقت سامنے آیا ہے جب حماس نے ٹرمپ کے 20 نکاتی امن منصوبے کے بعض حصے قبول کر لیے ہیں لیکن ’بورڈ آف پیس‘ کے نام سے مجوزہ عالمی نگرانی پر تحفظات کا اظہار کیا ہے۔