خیبر پختونخوا میں ضمنی بلدیاتی انتخابات کب ہونگے؟ شیڈول جاری

پشاور:الیکشن کمیشن آف پاکستان (ای سی پی ) نے خیبر پختونخوا میں ضمنی بلدیاتی انتخابات اور سینیٹ جنرل نشست کے انتخاب کا شیڈول جاری کر دیا۔

الیکشن کمیشن خیبر پختونخوا کی جانب سے جاری کردہ اعلامیہ کے مطابق صوبے کے 9 اضلاع میں 14 خالی نشستوں پرضمنی بلدیاتی انتخابات 19 اکتوبرکو ہوں گے۔

ان اضلاع میں پشاور، چارسدہ، شانگلہ، لوئر دیر، مالاکنڈ، کوہاٹ، ڈیرہ اسماعیل خان، ایبٹ آباد، ہری پوراورمانسہرہ شامل ہیں۔

جاری کر دہ اعلامیہ کے مطابق پولنگ صبح 8 بجے سے شام 4 بجے تک بلا تعطل جاری رہے گی،جبکہ ریٹرننگ افسران 22 اکتوبر کو حتمی نتائج کا اعلان کریں گے۔

دوسری جانب سینیٹ کی جنرل نشست پر انتخاب کیلئے بھی شیڈول جاری کردیا گیا ہے۔

الیکشن کمیشن خیبر پختونخوا کے مطابق سینیٹ کا انتخاب 30 اکتوبر کو ہوگا، جبکہ اس عمل کے لیے صوبائی الیکشن کمشنر سعید گل کو ریٹرننگ آفیسر مقررکیا گیا ہے۔

ای سی پی کے مطابق کاغذات نامزدگی 8 اور 9 اکتوبر کو جمع کروائے جا سکیں گے جبکہ امیدواروں کے ناموں کی ابتدائی فہرست 10 اکتوبر کو شائع کی جائے گی۔

شیڈول کے مطابق کاغذات کی جانچ پڑتال 13 اکتوبر تک مکمل کی جائے گی اورمنظوری یا مسترد ہونے کیخلاف اپیلیں 15 اکتوبر تک دائر کی جا سکیں گی،جبکہ امیدواروں کی نظرثانی شدہ فہرست 18 اکتوبرکو جاری کی جائے گی جبکہ 20 اکتوبرتک امیدوارکاغذات واپس لے سکیں گے۔

 خیال رہے کہ سینیٹ کی یہ نشست سینیٹر شبلی فراز کی نااہلی کے بعد خالی ہوئی تھی۔