بانی پی ٹی آئی کاعلی امین کو وزیراعلیٰ خیبرپختونخوا کے عہدے سے ہٹانے کا فیصلہ

اسلام آباد: پاکستان تحریک انصاف (پی ٹی آئی) کے بانی چیئرمین اور سابق وزیر اعظم عمران خان نے وزیراعلیٰ خیبرپختونخوا علی امین گنڈا پور کو تبدیل کرنے کا فیصلہ کرلیا ہے۔

تحریک انصاف ذرائع کے مطابق بانی چیئرمین پی ٹی آئی عمران خان عمران خان کی جانب سے سہیل آفریدی کو نیا وزیرِ اعلیٰ خیبرپختونخوا بنائے جانے کا امکان ہے۔

پی ٹی آئی کے فوکل پرسن رائے سلمان نے بتایا ہے کہ عمران خان نے توشہ خانہ کیس کی سماعت کے دوران پارٹی رہنماؤں کو علی امین گنڈاپور کو عہدے سے ہٹانے کے احکامات دیے ہیں۔

دوسری جانب اس حوالے سے چیئرمین پی ٹی آئی بیرسٹر گوہر نے کہا کہ علی امین گنڈا پور کے حوالے سے کوئی فیصلہ نہیں ہوا، تمام افواہیں پارٹی کو تقسیم کرنے کی سازش ہیں، ہم اس کی سختی سے مخالفت کرتے ہیں۔

بیرسٹر گوہر علی خان نے کہا کہ ایسی سازشوں کا مقصد داخلی انتشار پیدا کرنا ہے، ہم ہر قسم کے حالات میں متحد رہیں گے، علی امین گنڈاپور ہی ہمارے وزیراعلیٰ ہیں، ان کے خلاف پھیلائی جانے والی افواہیں قطعی طور پر بے بنیاد ہیں۔

انہوں نے مزید کہا کہ پارٹی کو تقسیم کرنے والی ہر کوشش کا ڈٹ کر اور موثر جواب دیا جائے گا، ہم ان سازشوں کو ناکام بنائیں گے، سچائی اور تنظیمی یکجہتی کے دفاع کے لیے ہم ہر فورم پر اپنا موقف واضح کریں گے، انتشار پھیلانے والوں کو کامیاب نہیں ہونے دیا جائے گا۔

پی ٹی آئی پنجاب کے رہنما فیصل ندیم گورچانی نے اڈیالہ جیل کے باہر صحافیوں سے گفتگو کرتے ہوئے کہا کہ جو بھی وزیر اعلیٰ آے گا ہمارا ہی ہوگا، رائے سلمان نے جیل سے باہر آکر بانی پی ٹی آئی کے فیصلے سے آگاہ کیا۔

پشاور میں غیر رسمی گفتگو کے دوران صحافی نے سہیل آفریدی سے سوال کیا کہ آپ وزیراعلیٰ خیبرپختونخوا بننے جا رہے ہیں، جس کے جواب میں سہیل آفریدی نے کہا کہ میرا نام کافی دنوں سے زیر گردش ہے، عمران خان کی جانب سے باضابطہ ہدایت موصول نہیں ہوئی۔