اورکزئی آپریشن میں شہید ہونے والے فوجی افسران کی نماز جنازہ ادا، وزیر اعظم،فیؒلڈ مارشل کی شرکت

راولپنڈی :خیبرپختونخوا کے ضلع اورکزئی میں بھارتی حمایت یافتہ دہشتگرد تنظیم ’فتنہ الخوارج‘ کے خلاف خفیہ آپریشن کے دوران شہید ہونے والے 11 بہادر سپوتوں میں شامل لیفٹیننٹ کرنل جنید طارق اور میجر طیب راحت کی نماز جنازہ چکلالہ راولپنڈی میں ادا کردی گئی۔

پاک فوج کے شعبہ تعلقات عامہ (آئی ایس پی آر) کے مطابق نماز جنازہ میں وزیراعظم پاکستان شہباز شریف، فیلڈ مارشل سید عاصم منیر، وفاقی وزرا، فوجی و سول حکام اور عوام کی بڑی تعداد نے شرکت کی۔

ترجمان پاک فوج کے مطابق دونوں افسران ان گیارہ بہادر سپوتوں میں شامل تھے جو ضلع اورکزئی میں بھارتی سپانسرڈ دہشت گرد گروہ "فتنہ الخوارج" کے خلاف انٹیلی جنس پر مبنی آپریشن کے دوران شہید ہوئے۔

وزیرِ اعظم شہبازشریف نے اورکزئی کے اس واقعے میں شہید ہونے والے گیارہ جوانوں کو خراجِ عقیدت پیش کرتے ہوئے کہا کہ پاکستانی قوم دہشت گردی کے خلاف مضبوط اور پختہ عزم رکھتی ہے اور شہداء کی قربانی اس بات کا غماز ہے کہ قوم اپنی مادر وطن کا دفاع کسی بھی قیمت پر کرے گی۔

شہداء کو ان کے آبائی علاقوں میں فوجی اعزازات کے ساتھ سپردِ خاک کیا جائے گا۔

واضح رہے کہ آج خیبرپختونخوا کے ضلع اورکزئی میں ایک آپریشن کے دوران سیکیورٹی فورسز نے بھارتی حمایت یافتہ 19 دہشتگردوں کو ہلاک کیا، جبکہ فائرنگ کے شدید تبادلے میں افسران سمیت 11 جوان شہید ہوگئے۔