پارٹی میں کوئی فاروڈ بلاک نہیں سب بانی کے ساتھ ہیں، علی امین کل گورنر کو استعفیٰ بھجوائیں گے،گوہرخان

اسلام آباد:پاکستان تحریک انصاف(پی ٹی آئی) کے چئیرمین بیرسٹر گوہر خان نے کہا ہے کہ پارٹی میں کوئی فاروڈ بلاک نہیں ہے تمام لوگ بانی پی ٹی آئی کے ساتھ کھڑے ہیں،علی امین بانی کی ہدایات پر عمل کرتے ہوئے کل گورنر خیبر پختونخوا کو استفعفی بھجوائیں گے۔

تفصیلات کے مطابق کے پی ہاؤس کے باہر میڈیا سے گفتگو کرتے ہوئے چیئرمین پی ٹی آئی بیرسٹرگوہر نے کہا کہ بانی کی ہدایات ہمیں موصول ہوچکی ہیں، بانی کی خواہش کے مطابق علی امین گنڈا پور کو استعفیٰ دینے کا کہا ہے۔

بیرسٹر گوہر علی نے کہا کہ علی امین گنڈا پور سے ایک گھنٹہ ملاقات ہوئی، تحریک انصاف میں کوئی فارورڈ بلاک نہیں ہے،اور نہ ہی بانی پی ٹی آئی کی بہنوں کا سیاست میں کوئی کردار ہے۔

چئیرمین پی ٹی آئی نے کہا کہ علی امین گنڈا پور کچھ دیر بعد پشاور روانہ ہوں گے، علی امین گنڈا پور اپنا استعفی گورنر کو بھجوائیں گے،ان کا کہنا تھا کہ میں خود اس بات کا مجاز نہیں کہ کسی کا استعفیٰ منظور یا مسترد کروں، خان صاحب نے یہ بھی فرمایا ہے کہ اگر کوئی تبدیلی ہو تو اسے آئینی تقاضوں کے مطابق انجام دیا جائے۔

میڈیا سے گفتگو میں ان کا مزید کہنا تھا کہ خیبرپختونخوا میں ٹوتھرڈ میجورٹی برقرار رہے گی،پی ٹی آئی کا ہر ورکر گراؤنڈ سے آیا ہے،علی امین گنڈاپور کے کردار کو ہمیشہ یار رکھا جائے گا، بانی کی سوچ کے مطابق صوبہ آگے بڑھے گا اور بانی کہ ہدایت کے مطابق اپنے فرائض سر انجام دیں گے۔

 گفتگو میں ان کا مزید کہنا تھا کہ وزیراعلیٰ کا استعفیٰ دینا ایک آئینی معاملہ ہے، علی امین گنڈا پور کی خدمات کو خراج تحسین پیش کرتا ہوں،بانی کی ہدایت کے مطابق خیبرپختونخوا آگے بڑھے گا،جبکہ نئے وزیر اعلیٰ کی قیادت میں جو بھی ٹیم بنے گی ہم سب انہیں سپورٹ کریں گے۔

چئیرمین بیرسٹر گوہر خان نے مزید کہا کہ علی امین گنڈاپور کو ہٹانے کی وجہ علیمہ خان کا معاملہ نہیں ہے، تحریک انصاف نے ہر اس آپریشن کی مخالفت کی جس میں لوگوں کو نقل مکانی کرنا پڑے، صوبائی حکومت نے کبھی آپریشن کی اجازت نہیں دی، علی امین گنڈاپور نے بہترین رول ادا کیا۔