کیس کا فیصلہ سناتے ہی ملز م نے فائرنگ کرکے جج کو قتل کردیا،دو افراد زخمی

ترانہ :البانیہ کی عدالت میں مسلح شخص نےکیس کا فیصلہ سناتے ہی فائرنگ کر کے جج کو قتل کر دیا،جبکہ واقعے میں دیگر دو افراد بھی زخمی ہو گئے۔

غیر ملکی خبر ایجنسی کے مطابق البانیہ کے دارالحکومت ترانا کی عدالت میں ایک کیس کی سماعت جاری تھی کہ اسی دوران ایک شخص نے جج پر فائرنگ کر دی۔

مقامی پولیس کے مطابق ملزم کی فائرنگ سے پراپرٹی تنازع سے متعلق کیس کی سماعت کرنے والے جج ایسترت کلاجا اسپتال منتقلی کے دوران انتقال کر گئے جبکہ دو افراد جو رشتے میں باپ اور بیٹا ہیں وہ بھی زخمی ہوگئے، جن کو بعدا ازاں فوری طور پر اسپتال منتقل کیا گیا تاہم دونوں کی حالت خطرے سے باہر ہے۔

دوسری جانب البانین پولیس نے فائرنگ کرنے والے 30 سال نوجوان کو حراست میں لیکر تفتیش کا آغاز کر دیا ہے اور ملزم کو عدالت کے اندر پستول کے ساتھ آنے کی اجازت دینے والے اس کے سکیورٹی گارڈ انکل کو بھی حراست میں لے لیا گیا ہے۔

پولیس کے مطابق جیسے ہی جج نے کیس کا فیصلہ سنایا تو ملزم نے فوری طور پر پستول نکالتے ہوئے جج پر متعدد گولیاں چلا دیں، اس کے بعد ملزم نے کیس کے درخواست گزار باپ بیٹے پر بھی گولیاں برسا دیں جس سے دونوں زخمی ہو گئے۔