بھارتی خفیہ نیٹ ورک کے خلاف NCCIA کی کارروائی، 2 ملزمان گرفتار

نیشنل سائبر کرائم انویسٹیگیشن ایجنسی (NCCIA) نے بھارتی خفیہ ایجنسی سے منسلک نیٹ ورک کے خلاف بڑی کارروائی کرتے ہوئے دو مشتبہ افراد کو گرفتار کر لیا ہے۔

ترجمان NCCIA کے مطابق، گرفتار کیے گئے افراد پاکستان کی حساس تنصیبات سے متعلق اہم معلومات بیرون ملک منتقل کر رہے تھے۔ حکام کے مطابق اس کارروائی میں ملزمان کے زیر استعمال موبائل فونز اور مالی لین دین کے شواہد بھی برآمد کیے گئے۔

ترجمان نے بتایا کہ ڈیجیٹل فرانزک تجزیے کے دوران مزید ثبوت حاصل کیے گئے ہیں، جو بھارتی نیٹ ورک سے ملزمان کے روابط کو مزید واضح کرتے ہیں۔

این سی سی آئی اے کا کہنا ہے کہ بھارتی خفیہ نیٹ ورک کے دیگر کارندوں کی تلاش جاری ہے، اور پاکستان اپنی ڈیجیٹل قومی سلامتی کے تحفظ کے لیے پرعزم ہے۔