افغان وزیر خارجہ کا بیان: افغانستان میں دھماکے پاکستان کی غلطی ہے

نئی دہلی: افغان وزیر خارجہ امیر خان متقی نے کہا ہے کہ حالیہ افغان سرزمین پر ہونے والے دھماکے دراصل پاکستان کی غلطی کا نتیجہ ہیں۔

بھارت کے دورے کے دوران صحافیوں سے گفتگو کرتے ہوئے امیر خان متقی کا کہنا تھا کہ ان دھماکوں میں کسی قسم کے جانی نقصان کی اطلاع موصول نہیں ہوئی۔

ادھر افغان وزارت خارجہ نے بھی ایک بیان جاری کرتے ہوئے ڈیورنڈ لائن کے قریب پاکستانی بمباری کی مذمت کی ہے۔

یہ بیان ایسے وقت سامنے آیا ہے جب امیر خان متقی بھارتی دارالحکومت نئی دہلی میں موجود ہیں۔ اس موقع پر ان کی ملاقات بھارتی وزیر خارجہ ایس جے شنکر سے بھی ہوئی، جس میں دونوں ممالک کے باہمی تعلقات اور تکنیکی تعاون پر تبادلہ خیال کیا گیا۔

بھارتی حکومت نے اس موقع پر اعلان کیا کہ افغانستان میں موجود بھارتی تکنیکی مشن کو باقاعدہ سفارت خانے کا درجہ دیا جائے گا۔

ملاقات کے دوران بھارت کی جانب سے افغانستان کو 20 ایمبولینسز کا تحفہ بھی پیش کیا گیا، جن میں سے 5 ایمبولینسز افغان وزیر خارجہ کے حوالے کر دی گئیں۔ جے شنکر نے انہیں ایمبولینسز کا دورہ بھی کروایا۔