فیض آباد میں محسن نقوی اور طلال چوہدری کا سیکیورٹی جائزہ، اہلکاروں کا حوصلہ بڑھایا

اسلام آباد: وفاقی وزیر داخلہ محسن نقوی اور وزیر مملکت برائے داخلہ طلال چوہدری نے فیض آباد کا دورہ کیا، جہاں انہوں نے سیکیورٹی صورتحال اور انتظامات کا جائزہ لیا۔

محسن نقوی نے رات گئے سیکیورٹی پر تعینات اسلام آباد پولیس اور فیڈرل کانسٹیبلری کے اہلکاروں سے ملاقات کی، ان کے جذبے کو سراہا اور ان کے حوصلے بلند کیے۔

وزیر داخلہ نے جوانوں سے فرداً فرداً مصافحہ کیا اور ان کی خوراک، پانی اور دیگر سہولیات کے بارے میں دریافت کیا۔ اس موقع پر انہوں نے آئی جی اسلام آباد پولیس کو ہدایت کی کہ ڈیوٹی پر مامور اہلکاروں کی ہر ممکن دیکھ بھال کی جائے۔

محسن نقوی نے اہلکاروں سے خطاب میں کہا "آپ سب ملک کے سپاہی ہیں، اور قانون کی عملداری میں آپ کا کردار انتہائی اہم ہے۔"

یاد رہے کہ تحریک لبیک پاکستان (ٹی ایل پی) کی جانب سے اسلام آباد مارچ کی کال کے بعد، وفاقی دارالحکومت اور ملحقہ علاقوں میں سیکیورٹی انتہائی سخت کر دی گئی ہے۔

انتظامیہ نے اسلام آباد اور راولپنڈی کے مختلف داخلی و خارجی راستوں پر کنٹینرز لگا کر سڑکیں بند کر دی ہیں، جس کے باعث شہریوں کو آمدورفت میں شدید مشکلات کا سامنا ہے۔

اس کے ساتھ ساتھ، وفاقی دارالحکومت اور راولپنڈی میں موبائل انٹرنیٹ سروس کو بھی گزشتہ شب 12 بجے سے تا حکم ثانی معطل کر دیا گیا ہے۔