ایک دن کی کمی کے بعد سونا پھر مہنگا،قیمت نئی بلند ترین سطح پر پہنچ گئی

کراچی: ایک دن کی کمی کے بعدسونے کی قیمت میں آج پھر بڑا اضافہ ریکارڈ ہوا، جس کی وجہ سے فی تولہ سونے کی قیمت نئی بلند ترین سطح پر پہنچ گئی۔

آل پاکستان جیمز اینڈ جیولرز ایسوسی ایشن کے مطابق آج ہفتے کے روز مقامی مارکیٹوں میں 24 قیراط کے حامل فی تولہ سونے کی قیمت میں  2100روپے کا اضافہ ریکارڈ کیا گیا جس کے بعد 24 گرام سونے کی نئی قیمت بڑھ کر 4لاکھ 22ہزار 700روپے کی سطح پر آگئی۔

ایسوسی ایشن کے مطابق اسی طرح ملک میں فی 10 گرام سونے کی قیمت 1800روپے بڑھ کر 3لاکھ 62ہزار 397روپے کی سطح پر آگئی۔

دوسری جانب عالمی بلین مارکیٹ میں آج فی اونس سونے کی قیمت میں 21ڈالر کا اضافہ ہونے سے نئی عالمی قیمت 4ہزار 016ڈالر کی سطح پر پہنچ گئی۔

خیال رہے کہ گزشتہ روز سونے کی فی تولہ قیمت میں 4578 روپے کی کمی ریکارڈ کی گئی تھی جس کے بعد سونے کی نئی قیمت 4 لاکھ 20 ہزار 600 روپے ہوگئی تھی۔